Awetardi Thessaly Zimmerman ta regresa Aruba

ORANJESTAD (AAN): Awe Diaranson 15 di December, pa 2:45 pm, un di e Top 10 muhernan mas bunita y inteligente di mundo, esta Thessaly Zimmerman lo yega bek su isla natal.

   Thessaly apenas Diadomingo anochi a cay den e 16 finalistanan, y despues den e 10 finalistanan pa e certamen di Miss Universe 2021 cu tabata celebrando su di 70 edicion.

   Su escogencia den finalistanan, a pone hopi hende na Aruba sinti un orguyo inmenso di su bon trabao!  El a trece un momento di union pa hopi persona, cu a cuminza grita sin fin dilanti nan pantaya di TV of di computer, pa keda apoya Thessaly riba escenario na Eilat, un ciudad portuario na Israel.

   Despues di 25 aña, porfin e maestro di ceremonia a anuncia nomber di Aruba pa bin dilanti como finalista.

   Tabata dia 30 di Juli cu a pasa, cu e organizacion local Star Promotion, bao direccion di e dinamico Anoutcka Koolman-Burleson (National Director di Miss Aruba) y Susanita Diaz-Maduro, a presencia e momento cu Prome Ministro Evelyn Wever-Croes a corona Thessaly como Miss Aruba Universe.  Un comision a haci un escogencia entre 4 dama hoben, y asina Thessaly a keda escogi.

   Thessaly Zimmerman di 27 aña di edad ta naci bao signo di Virgo, y tin estatura di 1.85 meter.  El a studia International Communication & Media.  E ta un persona cu semper tin un actitud y acercamento positivo, hopi bon disciplina y ta lucha pa su metanan.

   Awe Diaranson atardi pa 2:45 pm, e lo yega Aruba cu vuelo di United Airlines for di Newark (New Jersey).  DIARIO a compronde cu tin algo prepara pa su yegada den VIP Room.  Posiblemente lo bay tin varios di su amigonan, fanaticonan, y sigur admiradornan cu ta bay mire na su yegada.