ORANJESTAD (AAN): Manera cu DIARIO a trece dilanti caba den edicion di Diabierna, na caminda pa eleccion 2021 juni awo,
Camara di Comercio y Industria di Aruba (KvK) conhuntamente cu Universidad di Aruba lo organiza dos debate electoral caminda e lidernan di e diferente partidonan politico di Aruba ta invita pa debati riba varios topico relevante pa e maneho gubernamental di Aruba pa e proximo gobernacion y añanan benidero.
E meta ta pa a base di un plataforma obhetivo brinda pueblo di Aruba e oportunidad pa por sigui di cerca e debatenan unda topiconan critico ta worde debati. Mediante e debate e lidernan politico cu ta participa na eleccion 2021 por trece nan propuestanan y solucionnan encuanto e diferente retonan y oportunidadnan cu tin pa Aruba.
E fecha di e debatenan lo ta 3 di juni 2021 y 17 di juni 2021. Lo tene dos debate pa asina brinda e oportunidad pa debati riba mas topico y asina crea e oportunidad pa e participantenan di e debate elabora riba tur e topiconan.
E debatenan lo ser transmiti en bibo via Telearuba y via “live-stream” tambe. Lo tin un moderador cu lo dirigi e debatenan. E topiconan ta basa riba asuntonan importante pa pueblo di Aruba en general cu merece e debido atencion. Nos por menciona topiconan cu ta regarda economia, finanzas publico, labor, salubridad, turismo, asuntonan social, enseñansa y justicia.
E televidentenan y siguidornan via “live-stream” por dirigi pregunta digital, via SMS of telefonicamente na un panel independiente, di cual e moderador lo haya e preguntanan adicional lo worde haci na e politiconan via internet. Mas informacion encuanto e organizacion di e debate, horario y detayes relevante lo worde suministra den transcurso di e proximo simannan.
