ORANJESTAD (AAN): Premier Wever-Croes a anuncia dialuna durante un conferencia di prensa cu desde dialuna 7 di Juni 2021 tin un 'bubble' entre e islanan di Aruba, Bonaire y Corsow pa loke ta trata e maneho di Covid-19.
El a bisa cu esaki ta nifica cu awor ta posibel cu ora cu un persona ta viaha entre e islanan ABC y e persona ta vacuna cu tur dos dosis y 14 dia a pasa, e ora e no tin cu haci e PCR Test mas ora di drenta Aruba.
Corsow ya caba a anuncia e flexibilisacion aki siman pasa y na Aruba for di dialuna 7 di Juni esaki ta drenta na vigor.
Aruba a implementa tambe caba dia 1 di Juni cu si un persona ta residente di pais Aruba y e por prueba cu e ta vacuna cu tur dos dosis y 14 dia a pasa, e por drenta Aruba bek sin haci e PCR Test y awor esaki tambe ta conta pa esnan cu ta bin Aruba for di Bonaire y Corsow, e mandatario a remarca.
