Jesseline Kelly, Relacionista Publico:
ORANJESTAD (AAN) – E Relacionista Publico di Departamento di Asunto Social, Jesseline Kelly, den entrevista cu DIARIO, a referi na e tema di e luna di April, riba nan pagina informativo di facebook, ta “Crianza Comparti”.
DAS a haci un evaluacion y a traha un planning di aña, pa henter e aña 2023 pa toca temanan cu ta hot, den nan seccion cu ta duna guia.
“Seccion Bida y Famia ta e seccion di Psicologonan, Terapista di Pareha, Orthopedagoog, etc. Haci un peticion pa divorcio, Crianza Comparti, ta temanan cu nos ta atende cune, y diferente topiconan di famia”, Jesseline a comenta y a indica cu Crianza Comparti ta cu nan ta sali duna den e siguiente tres lunanan, diferente tips con pa yuda e cliente cu e parti aki.
“Pasobra hopi biaha, famianan y muchanan ta bin pidi guia; generalmente ta mucha cu ta den e fase di divorcio di con nan ta bay deal cu e parti ey, pa no influencia scol, y e bida di e mucha, etc.
Pesey mes, nos ta dunando hopi informacion over di e temanan aki durante e aña aki”, Jesseline a señala. El a indica cu esaki ta conta pa tur sorto di famia, e constelacion no ta importante, pero nan ta haya hopi peticion pa guia di muchanan y kizas parehanan tambe cu ainda ta pensando pa scapa e matrimonio, nan por acerca e departamento di Bida y Famia. El a enfatiza si, cu riba divorcio y crianza comparti, DAS ta duna hopi guia riba dje.
Jesseline Kelly a menciona cu Aruba ta conoci pa tin cifranan halto di divorcio, y esey ta cifranan conoci di matrimonio sin laga afo parehanan cu kizas no tabata casa pero cu ta separa y tambe tin su consecuencianan pa e yiunan.
