SANTO DOMINGO: Narcotraficantenan a haya un forma ingenioso unda ta bay sconde droga awor, ora di manda droga pa exterior.
Un container yena cu caha di mango tabata den proceso pa wordo hisa abordo di barco pa asina sali rumbo pa Gran Bretaña. Meymey di e mango y e cahanan mes no tabatin droga scondi. Pero e droga a wordo scondi na un forma hopi cuidadoso mes den e paletnan riba cual e cahanan ta poni.
Un total di 54 paki di cocaina a wordo confisca pa Polisnan di DNCD na Republica Dominicana, ora cu a haya e paletnan aki den un container na Waf di Boca Chica. Nan hunto cu Seguridad Militar di e Waf Multimodal Caucedo, hunto cu Douane y Ministerio Publico a bin descubri esaki ora di haci inspeccion. Djis pa puro casualidad a escoge e container ey pa inspecciona. Den presencia di Fiscal, a habri e container den cual tin centenares di caha di mango. Den esaki a haya seis palet di palo, den cual tabatin e 54 paki di cocaina scondi, lora den paki y mara cu tape shinishi.
Di e forma aki, autoridad a descubri un forma nobo di usa paletnan di palo pa sconde droga den containernan y trata di burla control di autoridad. Awor a cuminza cu un investigacion.
