Daniele Ferrara ta presidente nobo di Aruba Food & Beverage Association

ORANJESTAD(AAN): Aruba Food & Beverage Association (AF&BA) tin un board y presidente nobo.

Durante un conferencia di prensa PR di AF&BA Simi Chugani a indica cu despues di varios aña, Jan van Nes a retira como presidente di e asociacion, pero cu e lo keda si como miembro y consehero.

   “Van Nes ta un persona conoci pa su esfuerzonan y dedicacion den e industria hotelero aki na Aruba”.

E ta bay laga atras un bon ehempel pa e presidente nobo, segun Chugani, kende a splica cu AF&BA a nace for di Aruba Gastronomic Association (AGA), cu den pasado a enfoca solamente riba e sector di gastronomia.

   El a splica cu e idea a nace pa restructura e asociacion mirando e necesidad cu a crece na Aruba pa tin un asociacion cu ta mas inclusivo pa tur establecimento cu ta aporta na economia den Food & Beverage.

   “E intencion di e asociacion ta pa ta uno mas inclusivo den mayor sentido, for di restaurant, café, bar, wholesalers y trucknan di cuminda”, segun Chugani, kende a introduci Daniele Ferrara como e presidente nobo di AF&BA.