Anthony Mezas, promotor:
ORANJESTAD (AAN) – Den conferencia di prensa, den cual e Relacionista Publico di Departamento di Cultura Aruba (DCA), a anuncia e Dance Aruba Congress cu ta bay tuma lugar, e promotor Anthony Mezas a amplia e informacion aki.
Mezas a indica cu, basicamente, el a bin cu e idea aki desde aña 2018, ya cu semper e tabata tin e deseo di bin cu algo special cu rond mundo ta hopi popular: un congreso di baile.
El a bisa cu tin congresonan di baile rond mundo, manera na Singapore, Maruecos, Turkey y hopi otro pais unda cu e salsa cu nos conoce, y cu ta algo Latinoamericano, ta genera dos mil hende na un congreso. Mezas a haya esaki hopi interesante pa Aruba tambe haye.
Anthony Mezas a indica cu tin hendenan ta saca hopi placa pa bay specialmente na e congresonan aki, unda bailadornan di otro paisnan ta bin, y ta paga pa participa den e congresonan aki. El a reitera cu esaki ta hopi interesante pa Aruba, den e sentido cu lo atrae diferente hende cu normalmente no ta bin akinan pa baile, anto el a pensa den organize, pero Covid-19 a bin y no por a bay door. Pero 2022 e ta kere cu ta un aña tremendo, y ideal pa organiza esaki. E lo tuma lugar na September 1,2,3 y 4. Nan lo ofrece e bishitantenan Aruba como un producto sumamente bunita. Pa hopi hende Aruba ta un paraiso, y pa bin balia tambe e ta kere lo ta un gran encuentro. Arubianonan ta papia cuater idioma, y esey tambe Anthony ta kere por haci cu un evento asina, anualmente, tin e chens di crece.
E bishitantenan lo wordo ofrece diferente fiesta, manera “pool party”, “beach party”, etc., y tur anochi lo tin baliamento como tambe tayernan. Esaki ta un evento hopi internacional, Anthony a bisa. Nan ta anticipa como 30 pais cu lo bin Aruba.
Dia 27 di Augustus, el a splica, nan kier involucra Aruba tambe, pa nos ciudadanonan bin ser conoci cu e fenomeno di un Congreso di Baile. Di 27 pa 31 di Augustus lo bay tin diferente fiesta, unda cu e comunidad di Aruba ta bon bini, pa ser conoci cu e baile. Dia 27 lo tin e prome round preliminario di e Congreso di Baile, su apertura di e prome competencia di salsa, cual final lo tuma lugar otro aña na Spaña. Dia 31 di Augustus lo tin e di dos round y e final lo a dia 1 di September, y tin diferente localidad unda esaki lo tuma lugar.
