Minister Ursell Arends a reuni cu Turtugaruba
ORANJESTAD (AAN): Algun siman pasa, Minister Ursell Arends a reuni cu Fundacion Turtugaruba unda nan a presenta nan relato anual. E relato ta indica cu polucion di luz ta un di e menasanan mas grandi pa e sobrevivencia di turtuga. Aruba ta priveligia pa ricibi 4 especie di turtuga pero nan ta den peligro di extincion.
Tur aña tin 5% menos turtuga ta yega nos playa y ta bira un tarea di cada ciudadano y di Gobierno di Aruba pa proteha un especie asina stima. Nos tur por haci nos parti door di e.o. no uza flash ora di saca potret, evita fiesta banda di lama parti anochi, uza bombillo cu ta mas safe pa e turtuganan manera Amber LED y atende cu beach cleanups pa asina kita obstaculo nan cu lo por stroba e turtuga sinti sigur ora di yega canto.
Di maart pa september Ministerio di Naturalesa ta pidi extra cooperacion di tur hende na Aruba pa ta mas consciente di neishi di turtuganan riba nos lamanan.
Turtugaruba ta percura pa proteha y conserva turtuganan cu ta subi nos canto pa pone webo y tambe e turtuganan chikito cu ta sali di e webo pa haya nan caminda bek den lama.
Yama e turtle hotline na +297-5929393 si bo persona a encontra un turtuga of a wak indicacion di un neishi recien coba.
