Dama di 110 aña tambe a ricibi Condecoracion Real

ORANJESTAD (AAN): Riba Diabierna 30 di april 2021, den cuadro di e Ocasion General, a tuma luga otorgamento anual di Condecoracionnan Real den Ballroom di Aruba Marriott Resort.

   Gobernador di Aruba, Alfonso Boekhoudt, a haci entrega di e condecoracion na e condecoradonan di Aruba presente. En conexion cu e medidanan vigente contra corona, Gobernador no por a adheri e condecoracion riba nan paña. En bes di esey, a ofrece e condecoracion den un cahita luhoso, y despues e condecoradonan mes por a bisti’e riba nan paña.

      Den e parti Caribense di Reino Hulandes e aña aki a condecora 80 persona total: 33 na Aruba, 31 na Curacao, 7 na St. Eustatius, 6 na Bonaire y 3 na St. Maarten.

   E aña aki tin como elemento particular cu na Aruba un dama di no menos di 110 aña a wordo nombra como Lid in de Orde van Oranje Nassau.  Ta trata di señora Mary L. Benjamin, kende a nace dia 14 di Juli 1910.

   A base di datonan historico, tin e suposicion cu e dama Mary L. Benjamin aki di Aruba ta e persona di edad mas avansa cu a yega di ricibi un Condecoracion Real den Reino Hulandes.

   E dama mes no por a presenta pa busca e Condecoracion Real.  Pero a pone un potret di dje riba e mesa banda di e condecoracion y su cahita luhoso.  Un representante a bay busk’e pe.