Minister Geoffrey Wever
ORANJESTAD (AAN): Diaranson, 26 di februari 2025, Minister Geoffrey Wever conhunto cu Departamento di Asuntonan Economico, Comercio y Industria (DAECI) a anuncia e serie di tayer: “She Means Business: Women Empowerment Month”.
Durante e luna di maart lo tin diferente workshops, presentacion y networking sessions. Lo duna workshops di con pa desaroya e 'business mindset' corecto, con pa crea un plan strategico y sostenibel como tambe con pa haci miho uzo di entre otro Inteligencia Artificial (AI). Tur esaki pa empodera y ekipa tur participante cu e tools corecto pa asina crea strategianan practico.
E proyecto aki ta dedica pa empodera specialmente empresarionan femenino cu kier cuminsa un negoshi of cu tin un negoshi establici caba pero cu kier sa mas di e ultimo tendencianan tecnologico.
Lo bay tin total di 10 workshops y e prome lo ta 10 di maart proximo. Aunke luna di maart ta luna di e ser femenino, e tayernan aki ta habri pa tur hende cu tin aspiracion pa habri un negoshi pero tambe pa esnan cu ja caba ta manehando.
"Un di nos main focus como ministerio di asuntonan economico ta pa empodera nos ciudadano- y empresarionan cu e conocemento y informacion necesario pa nan por progresa y experiencia exito den negoshi. Cu e workshop aki nos kier ekipa nos hendenan local cu tin ambicion pa siña mas di con ta maneha un negoshi, cu conocemento di e ultimo tecnologianan pa haci negoshi mas eficiente y sostenibel", Minister Wever a bisa.
Pa participa na tur e workshops no tin ningun gasto involvi. Pues no perde e oportunidad aki y registra awe mes door di manda un mail pa sra. Sharon Meijer na: This email address is being protected from spambots. You need JavaScript enabled to view it.
Na final di e trayecto aki cada participante lo ricibi un certificado como muestra di participacion.
Minister Wever kier a gradici ful e team di DAECI pa nan esfuerso continuo pa organisa tayernan y eventonan cu ta sigui crea impacto positivo pa e clima empresarial di Aruba. Un danki special ta bay na sra. Meijer pa a organisa e tremendo proyecto aki, y un palabra di exito na tur participante di awor caba.
