Segun Banco Central di Aruba
ORANJESTAD (AAN): Banco Central di Aruba (CBA) ta publica e “State of the Economy” pa e prome nuebe luna di 2024. E publicacion aki ta contene un analisis di desaroyonan nacional y internacional. E puntonan di mas clave ta presenta akibou.
E economia Arubano e crece cu 7,8% durante e prome nuebe luna di 2024 compara cu e mesun periodo di 2023. Crecemento persistente den actividadnan den turismo a empuha e crecemento aki, cu e cantidad di bishitante “stay-overs” subiendo cu 16,4% y bishitante crucero cu 13,2%. Aunke turistanan tabatin un estadia promedio mas cortico na Aruba, ingreso di turismo a aumenta na Afl. 3,1 biyon. E cantidad aki ta inclui solamente e transaccionnan registra na banconan comercial.
E Turismo mas fuerta tambe a duna un impulso grandi na consumo. Por ehempel, mercancia importa (excluyendo mashin y ekipo electrotechnico) a crece cu 9,2%. Prestamo personal, consumo di electridad na cas (den kWH), y pagonan registra riba e sistema di I-Pago tambe a aumenta. Adicionalmente, e prestacion fuerte di turismo tambe a beneficia ingresonan for di impuesto. Na mesun momento e mercado laboral a sigui mehora y hunto cu mas actividad economico a empuha casi tur componente di impuesto.
Aunke tin inversion andando den e sector hotelero pa acomoda mas turista, algun indicador di inversion a cay durante e prome tres kwartaal di 2024. Cantidad di material di construccion importa, e balor di hipoteca comercial nobo, y permiso pa construccion a baha. Di otro banda, e balor di hipoteca nobo pa cas a expande y e indice di e “Business Perception Survey” (BPS) a mehora.
Den e prome nuebe luna di 2024, mas placa a drente Aruba su economia cu a sali. Exportacion relata na turismo a trece ingresonan signficante, mientras pagonan pa importacion tabata mas abou den comparacion. Adicionalmente, mas placa a drenta e pais via inversion y otro transaccion financiero compara cu loke a sali. Esaki a resulta na un surplus riba e balansa di pago, asina hisando e reservanan oficial na Afl. 3,4 biyon y reservanan internacional na Afl. 3,8 biyon na fin di september 2024. Di e manera aki, divisanan ta keda ampliamente adecua, locual ta sostene CBA su mandato principal di mantene e tasa fiho di e florin cu e dollar Mericano.
Durante e ultimo 12 luna, prijsnan, riba un averahe, tabata mas halto cu e 12 lunanan prome. Den e periodo september 2023 – september 2024, prijsnan a aumenta cu un averahe di 2,0%. E tres contribuyente principal na e inflacion aki tabata comunicacion, vivienda, y cuminda. Ademas, comparando september 2024 cu september 2023, prijsnan a subi cu 1,5%. Ta sumamente importante pa monitor inflacion pasobra e ta impacta consumo, inversion, empleo y finalmente nos divisa. CBA lo sigui vigila e desaroyo den inflacion di cerca.
E publicacion completo to disponibel riba CBA su website (https://www.cbaruba.org/document/state-of-the-economy).
