Atrobe rumornan ta circula cu e lo ta retirando di musica
SAN JUAN: E reguetonero puertoriqueño Daddy Yankee a bolbe lanta stof e ultimo dianan aki, y rumornan a bolbe zwaai tur caminda encuanto su retiro for di stage, ora cu el a pone riba social media cu e lo bay duna “su ultimo” tour mundial na 2022.
Ramón Ayala Rodriguez, cu ta e nomber di berdad di e cantante, a pone un video riba su account di Instagram y a pone e texto aki: “E aña aki 2022 mi lo duna mi ultimo tour na mundo. Na cual pais boso kier mi bay?”
Ademas di esey, el a pone e hashtag tambe di “#LaUltimaVuelta” cu kizas lo por ta e titulo di su Tour.
E video cu el a pone, ta un compilacion di e conciertonan di e cantante na Coliseo di Puerto Rico na 2019, unda el a duna 12 presentacion dilanti 170.000 persona.
“E caminda ta duro, pero e duro ta keda na caminda. Mi a soña cu loke mi ta bibando, y awor ami ta e soño bibo,” e artista a bisa na comienzo di e video.
Daddy Yankee ta autor di varios exito global manera ‘Gasolina’, ‘Con Calma’, y ‘Dura’, ademas di ta ganador di multiple premio.
