ORANJESTAD (AAN): Famianan ta keto bay disgusta pa cu e trato cu nan yiu a ricibi siman pasa, ora cu el a acudi cu urgencia na Servicio di Emergencia na ImSan y el a wordo nenga asistencia.
Nan yiu ta bibando hopi aña caba na Hulanda, y el a bin Aruba pa pasa vakantie cerca su Mama y Tata na San Nicolas. Despues di hopi tempo e tabata bek na su isla natal, admirando tur e cambionan cu Aruba a pasa aden. Cu asombro el a mira con bunita e Green Corridor a keda, como tambe Watty Vos Boulevard cu a yuda Aruba su fluho di trafico bira mas suave.
Sinembargo debi na un descuido, diripiente el a corta su pia malamente. Cu urgencia su famianan a core hibe na Servicio di Emergencia, pa purba stop e sangramento.
Enberdad nan yiu no tin Zorgpas di AZV como cu e no ta biba na Aruba. Pero nan a keda asombra cu tur su pia ta sangrando bay goal den e sala di espera dilanti e loket, e personal di ImSan a nenga di atende. Djis pasobra e no tin Zorgpas.
“Nan no a ni sikiera pone un verband pa stop e sangramento, y a djis bise cu nan no por atende,” e tata a indica.
Como cu nan no a haya ningun yudanza, e famia a regresa nan cas, cu e pia keto bay sangrando den auto. Na cas a check rond cerca bisiñanan kende lo por sa algo di First Aid. Como cu no a haya ningun hende, e ora e famia mes a purba di djis usa material cu nan tin na nan cas pa lora e pia pa trata na stop e sangramento, cu e speranza cu nan yiu no ta bay den shock, y haciendo oracion na Dios cu e corta grandi lo no haya infeccion pisa despues.
Nan a djis desea di avisa prensa di loke a socede, y cu nan a kere cu semper un personal medico ta wordo siña como prome cos: “Yuda prome, y despues atende asunto di cobranza”.
Awor e yiu ta bayendo Hulanda bek, y ta spera di por acudi na su docter aya pa mira con e herida aki a wordo wanta door di su mesun famia, cu e speranza cu e famia no a haci e cos peor.
