Director di Directie Luchvaart Edwin Kelly:
ORANJESTAD (AAN) Departamento di Aviacion Civil, tambe tin su metanan di desaroyo sostenible 2020-2030, manera instancianan internacional a propone, y cu Aeropuerto Reina Beatrix y otro instancianan local tambe ta traha pa logra.
Siguiendo cu e entrevista di DIARIO cu Director di Aviacion Civil señor Edwin Kelly, a referi na e aspecto aki.
El a relata cu como Directie Luchtvaart, tambe nan tin cu crece, conhuntamente, cu e industria di aviacion, cu ta consisti di Aeropuerto, ANSA, Aerolineanan y den cierto sentido DAC tambe ta delinea e maneho di crecemento, hunto cu e stakeholders. “Y di otro banda, como inspectie nos mester bay hunto cu nan. Y nos inspectornan mester ta entrena tambe den e style di avionnan nobo, pues nos mester tin e mesun calificacion, compara cu e operadornan cu nos tin, cu nos a supervisa”, señor Kelly a señala.
El a menciona cu tur departamento di Aviacion Civil tin nan programanan di opleiding. ICAO ta rekeri tambe cu DAC tin un presupuesto cu ta cubri tur e necesidadnan pa cursonan. Nan ta efectuando eseynan tambe. El a reitera cu nan tin diferente tipo di curso, manera curso online di un dia, y presencial, manera esun mas reciente cu a tuma varios dia.
Stimula hende muher: El a resalta tambe cu su colega cu siman pasa, a gradua den su Postgrado Academico den Derecho Aeronautico, ta un hende muher, y den e curso reciente di “Safety Management System” e instructornan ta hende muher, y den klas tambe tin diferente dama, y esey ta algo cu tanto Directie Luchtvaart como ICAO ta purba promove, pa hopi hende muher sinti nan mes comodo di join tambe e mundo di aviacion, cu ta un mundo hopi dinamico y hopi great pa traha den dje.
“Sigur esey ta tambe e obhetivo di Directie Luchtvaart, pa algun aña caba, ta promove y stimula hende muher mas tanto posible pa bay studia den e ramo di aviacion y despues bay traha den e ramo aki”, director señor Kelly a reitera.
