ORANJESTAD (AAN): Bo ta buscando un profesion cu ta haci impacto riba e generacion actual y e futuro generacion?
Scoge pa e profesion di maestro di Enseñansa Primario. Como maestro
bo lo crece riba tereno profesional y personal, bo lo haya satisfaccion di bo trabao y bo
lo contribui na futuro di bo pais. Scoge pa e estudio pa Maestro di Enseñansa Primario
di Instituto Pedagogico Arubano (IPA) y sea e cambio!
Estudio pa Maestro di Enseñansa Primario ta forma maestro cu ta cualifica pa duna les
na mucha di scol preparatorio y/ of scol basico: un maestro cu ta funciona
competentemente den klas, na scol y den comunidad.
Tin dos grupo di participante cu por haci e estudio pa Maestro di Enseñansa Primario:
- Studiante cu tin diploma di sea HAVO, VWO of MBO nivel 4 of si ta den examen
klas di esakinan.
- Persona cu desde 1 di september 2025 tin minimo 21 aña y cu kier haci un
estudio na IPA, pero no tin diploma di sea havo, vwo of mbo nivel 4, por inscribi pa haci
e asina yama 21+ Toets. Inscripcion pa e 21+Toets a cera caba for di 29 di november
2024, dus no ta posibel mas pa inscribi pa 21+ Toets pa aña academico 2025-2026.
Informacion di e Estudio pa Maestro di Enseñansa Primario
Website
Tur informacion di Estudio pa Maestro di Enseñansa Primario ta riba website di IPA. Subi
www.ipaaruba.com y click riba opleidingen sigui pa Leraar Primair Onderwijs. Aki lo bo
haya informacion di entre otro contenido di e estudio, kico bo por haci despues di e
estudio, gasto y procedura di inscripcion.
Open Dag 2025: The Influencer Teacher
Durante open dag di IPA, dia 1 di februari 2025, lo ofrece dos sesion di informacion
general di Estudio pa Maestro di Enseñansa Primario cu bo lo por atende. E orario di
sesion 1 ta 10:45 am y di sesion 2 ta 11:30 am.
Pa e estudio aki nos lo brinda the ‘whole experience’. E bishitantenan lo participa
activamente na actividad cu nos docentenan di diferente area di formacion a prepara
pa nan. Lo clausura e experiencia aki cu un presentacion di informacion general.
Inscripcion
Tur persona cu ta interesa pa haci Estudio pa Maestro di Enseñansa Primario y of e 21+
Toets por inscribi via e website www.ipaaruba.com. Pa por inscribi mester cumpli cu e
pago di AWG 80,- y pone como anexo copia di comprobante di pago den formulario
digital di inscripcion. Tene na cuenta cu e comprobante mester tin bo nomber riba dje,
p’asina nos sa na ken e pago ta pertenece.
Na final bo lo ricibi confirmacion di bo inscripcion. E ultimo dia pa inscribi pa Estudio pa Maestro di Enseñansa Primario ta dia 1 di mei 2025. Despues di e fecha aki no tin posibilidad mas pa inscribi.
