Michella Steenvoorde-Lacle:
ORANJESTAD (AAN) – Michella Steenvoorde-Lacle, Beleidmedewerker Social, di e Proyecto Plan di Mayor, a elabora den entrevista cu DIARIO, tocante e curso Plan di Mayor, cual a conclui cu resultado exitoso.
Michella a expresa cu e ta hopi contento y cu ta un bendicion cu por a yega asina leu cu e profesionalnan ta hayando e “Opleiding Famia y Mediation”, pasobra den futuro e mayornan lo mester traha un plan di mayor, cu ta un documento cu areglonan y den areglonan ey nan lo bay stipula con nan ta bay comparti e responsabilidadnan pa cu nan yiunan.
El a splica cu nan a haya tools pa por guia esnan cu mester di esaki den e proceso, pasobra tin mayornan cu nos mester haya guia; nan ta bay yega na e Plan di Mayornan mes.
Pa esnan cu si mester di guia, tin profesionalnan ekipa pa yuda nan sali di nan problema di relacion y enfoca riba e mucha, kico e tin mester pa pasa den e proceso mas trankil posible y sin keda cu trauma, cu por ta por causa cu e ta bay atras den scol, etc.
Michella a indica cu loke ta bay sigui awor ta e “kies opleidingnan” unda nan ta bay ekipa e docentenan pa haci un intervencion cu e muchanan, pa nan sa kico nan ta sinti ora di pasa den e proceso aki y duna nan mas tools pa nan ta mas fuerte den nan zapato, pa e ora ey nan por comunica y papia cu nan mayornan y bisa nan, kico nan ta desea di mira, con nan ta desea pa e situacion nobo funciona.
