Curso di Dr. Everold Hosein ta pa yuda desaroya mihor metodonan pa lanta bo yiu

*Intencion ta pa desaroya un campaña publico

ORANJESTAD (AAN): Dialuna  empleadonan di Centro pa Hoben y Famia a haya continuacion di un curso cu nan a ricibi algun aña pasa for di Dr. Everold Hosein, kende ta un experto den comunicacion.

Den un entrevista Yvonne Geerman Bermudes, coordinador di e centro a splica cu e curso actual ta un asina yama ‘refreshment course’ pa continua riba e informacion cu a wordo duna dos aña pasa pa Hosein.

E curso di 2 aña pasa tabata uno di 8 dia y awor e veld social a haya un biaha mas informacion valioso.

“Durante full e siman aki nos ta bay ta bezig ta bay den comunidad y pone den practica e conocimento cu nos a ricibi, unda cu nos ta bay haci entrevistanan cu mayornan y juffrouwnan di scol, riba caya y na pia di trabao, unda cu kier inventariza e necesidadnan di mayornan y kico por contribui na un plan di mercadeo efectivo pa mayornan cu kier lanta nan yiunan riba un forma positivo”, segun Bermudes.

DIARIO a entrevista tambe Hosein y el a splica cu el a bin Aruba representando UNICEF Netherlands cu ta traha hunto cu Gobierno di Aruba, riba desaroyo di un campaña di educacion riba con pa bira un mihor mayor.

El a splica cu dos aña pasa el a cuminza ta duna training riba con pa haci uso di comunicacion pa asina hende por haci uso di cierto comportacion pa mehora nan ‘talentonan’ di ta un mayor.

“Durante e bishita aki nos ta refresca memoria di esnan cu a participa na e training di dos aña pasa y despues e idea ta pa drenta diferente comunidad y papia cu mayornan riba e retonan di ta mayor, unda cu nos ta duna algun recomendacion riba con nan por ta mihor mayor”, segun Hosein.

El a indica cu e ta spera cu despues di e parti ey, por desaroya un campaña publico di educacion, cu comportacionnan specifico cu ta recomendable pa mayornan uza pa lanta nan yiunan.

Un di e ehempelnan por ta cu tin mihor maneranan pa disciplina bo yiu, cu no ta dal e cu faha of grite.