ORANJESTAD (AAN): Diamars anochi e sorteo di ‘Mega Millions’ na Merca tambe tabatin un jackpot gigantesco di 810 miyon Dollar.
Esaki tabata e di cuatro premio mas grandi cu a yega di wordo rifa na Merca.
Na ciudad di Cleveland, na estado di Ohio, un periodista di WJW-TV canal 8 di cu ta afilia na Fox, a bay bishita un Gasoline Station unda tabatin un rij di hende para pa cumpra ticket pa e loteria.
E empleado cu ta atende publico, a bisa cu nunca antes el a yega di mira asina hopi hende bin cumpra ticket pa e loteria, y el a bisa cu tabata un anochi hopi druk.
E gasoline station aki na Parma Heights a yega di bende ticket ganador den pasado, pues hopi a bin te eynan sperando cu suerte lo por pasa eynan atrobe.
Un cliente para den rij, Diane Krous a bisa cu na aña 2009 el a yega di gana 100.000 Dollar. “E biaha aki si mi gana, mi lo duna e placa na mi nietonan.”
Otronan para den rij a papia di paga tur nan debe, y haci viahe.
Charmaine Salupo para den rij, a bisa cu si acaso e gana, e ora el hunto cu su casa lo viaha pa Aruba.
“Nos tur dos ta traha den industria di staal, pues esaki definitivamente ta un soño pa nos.”
E chens Diamars anochi pa un solo ticket match tur seis number di Mega Millions na Merca, tabata 1 den 302 miyon.
