Fondo Monetario Internacional ta confirma advertencia di DIARIO --- Realidad economico ta baha calidad di bida cu hende conoce --- Paisnan mester tuma medida den un situacion hopi scur
ORANJESTAD(AAN)- Cu DIARIO no a presenta informacionnan pa causa susto ni preocupacion innecesario, a keda confirma ayera na momento cu e Fondo Monetario Internacional oficialmente a publica loke por spera na mundo.
Den un comunicado cu a mira luz ayera, e Fondo Monetario Internacional a splica cu tur hende mester prepara nan mes pa e realidad nobo, cu lo ta sumamente dificil pa tur hende.
Cu mundo no sa kico ta spera den futuro, ta haya confirmacion den e advertencia cu e Fondo Monetario Internacional a emiti y francamente ta uno di e boletinnan mas pisa cu nos a yega di mira.
E situacion cu mundo conoce awe, lo empeora pasobra e resultadonan economico cu a wordo spera, ta menos pero ainda ta papia di un crecemento di 3,2 porciento.
E aumento di prijsnan ta resultado e hecho cu e produccion no por cumpli cu demanda, loke ta aumenta prijs y asina ta causa inflacion.
E panorama mundial cu International Monetary Fund ta presenta ta encera tambe medidanan cu gobiernonan lo mester tuma pa enfrenta un futuro cu lo exigi di hende pa adapta nan gastonan y asina pues lo afecta e calidad di bida.
Prijs di cuminda y gas ta sigui subi den un situacion cu ta bay exigi pues Na e adaptacion di mundo.
Paisnan cu menos entrada, cu ya ta den problema serio, lo mester prepara pa problema mas grandi.
Aruba ta realisa kico ta na caminda pa mundo? Con calidad di bida ainda ta y con prepara Aruba realmente ta pa loke por presenta?
Ora papia di un recesion, mester bolbe na 2008 ora Aruba a conoce introduccion di BBO. Sinembargo, e tempo no por bisa cu Aruba realmente a sinti peso di e recesion pa loke ta trata e resultadonan cu e tabata tin personalmente pa ciudadanonan.
E recesion cu tin dilanti porta, segun expertonan, y pa cual DIARIO a adverti ya basta tempo lo mishi cu condicionnan di bida directamente y lo haci cu mester adapta costumbernan cu a conoce te awe na realidad cu ta dilanti di porta.
Mester adapta bida na realidad nobo.
Aruba mester tene na consideracion cu prijsnan ta subi y manera na tanto momento DIARIO a adverti cu den futuro e situacion mundial por mishi cu resultado economico manera sigui baha forsa di turistanan loke lo afecta pues economia directamente.
E informenan di e Fondo Monetario Internacional ta conforme informacionnan cu DIARIO a entrega na Aruba cu awe atrobe ta wordo pidi pa prepara su mes pa temponan dificil den un situacion mundial internacional cu DIARIO lo sigui analisa cu cifranan y informacionnan oficial mundial.
