ORANJESTAD (AAN): Diadomingo ultimo, den su discurso nacional, Prome Minister Evelyn Wever-Croes a repasa e desaroyo y logronan positivo di e ultimo dianan.
E logro talbes mas importante na e momentonan aki, ta e hecho cu Gobierno di Aruba a logra paga e 5% na empleadonan cu ta traha pa Gobierno y pa fundacionnan subsidia pa Gobierno. Ainda talves tin organisacionnan semi publico cu tin cu regla algun cos, pero e gran parti di empleadonan ya a ricibi nan salario.
Prome Minister a expresa cu Gobierno a tuma e decision aki mirando e costo di bida a aumenta, tur cos a bira mas caro door di e guera na Ucrania. “Ta nos deber pa a duna e empleadonan salario di 100% bek. Ohala cu sector priva, esnan cu ainda no ta pagando 100% di e salario, por sigui e ehempel aki tambe”.
Prome Minister a remarca cu apesar di a cuminsa prepara pa entrega bek desde fin di aña pasa, e no tabata facil. Desde fin di aña pasa, Gobierno a informa comunidad cu Gobierno tin pensa di cuminsa stop e recorte den di dos mita di e aña aki. Esaki ta e mensahe cu Gobierno a manda pa Hulanda y pa e comunidad local na Aruba.
“E mesun linea di comunicacion aki, mi a hiba desde fin di aña pasa te cu awor. Na caminda tin hende cu a cansa, tabatin hende cu tabata kier e pago mas trempan y no kier a warda te mita di e aña. Tabata tin hende cu a cuminsa bisa cu Gobierno ta gaña, cu Gobierno no ta serio.
Awo por demostra tur esnan cu a confia den nos, y esnan cu talves a cuminsa perde confiansa den nos, cu nos a cumpli. Nos no ta un Gobierno cu ta papia pa papia, nos ta un Gobierno serio cu ta evalua bon prome cu bisa algo, y ora nos bis’e, ta pasobra nos por cumpli. Esey nos a haci den pasado, esey nos ta haciendo awor, y esey mes nos lo sigui haci den futuro.
Den nomber di Gobierno di Aruba, mi ta gradici sindicatonan pa nan lucha den esaki, no tabata facil, pero na fin di dia, nos a logra y sindicatonan tabata tin un parti importante den e lucha aki. Mi ta gradici tambe empleadonan publico y di sector semi publico pa bo sacrifico desde 1 mei 2020, te awor. Mi ta spera cu e hecho cu awor bo salario ta bek na 100%, por yuda bo poco mas den combati e retonan cu bo por ta enfrenta”, Prome Minister Evelyn Wever-Croes a bisa den su discurso dirigi na pueblo di Aruba diadomingo ultimo.
