Cuerpo Policial su unidad di Mobiele Eenheid a ricibi nan bus nobo completamente ekipa

Minister Rocco Tjon:

ORANJESTAD (AAN): Minister di Husticia y Asuntonan Social sr. Rocco Tjon, conhuntamente cu Korpschef sr. Ramon Arnhem, a bishita Crisis Management Office (CMO) antes Bureau Rampen Bestrijding (BRA) pa asina presencia e entrega di e bus completamente nobo pa Cuerpo Policial di Aruba, pa e unidad Mobiele Eenheid.

   Esaki ta un di e proyectonan cu Ministerio di Husticia y Asuntonan Social a percura pa ehecuta pa loke ta Cuerpo Policial, mirando e necesidadnan cu nan tin. Pa prome biaha, Cuerpo Policial di Aruba lo tin un bus asina, pa e unidad Mobiele Eenheid, caminda a tene cuenta cu tur e rekisitonan cu tin pa loke ta trata e unidad aki.

   Manera ta conoci Mobiele Eenheid tin un rol sumamente importante pa loke ta trata mantene orden publico, y pa e motibo aki a percura pa adkiri e bus aki, cual ta cumpli cu tur e rekisitonan di loke nan tin mester pa nan propio siguridad, y consecuentemente pa por mantene orden y siguridad pa tur esnan na e evenemento caminda nan lo patruya.

   E bus aki ta un inversion di alrededor di mey miyon Florin, y ta cumpli cu e parti di bulletproof, camara, heat sensors, y di paden e personal lo por wak kico ta pasa pafo, y asina nan por ta miho prepara pa nan propio siguridad.

   Pa e motibo aki, a percura pa obtene mas fondo pa Cuerpo Policial, pa asina por ehecuta tur e proyectonan cu ta necesario pa garantisa na prome luga e siguridad di nos comunidad, pero tambe di nos Agentenan Policial.

  Pa por a logra ehecuta e proyecto aki, e tabata hopi importante di por a conta cu e input di Cuerpo Policial mes, pa asina sa kico ta e necesidadnan cu nan tin pa por aloca e fondonan debidamente pa adkiri e bus aki.

   Banda di esaki, nos ta gradici BRA tambe, pa a facilita henter e proceso pa trece e bus aki Aruba den un tempo record, como cu nan tabata tin e contacto cu e compania na Merca cu ta duna e servicio aki.

   Un pabien pues na Cuerpo Policial y e unidad di Mobiele Eenheid, cu e bus nobo aki, caminda nos ta sigur cu nan lo haci bon uzo di dje, pa nan propio siguridad y e siguridad di henter pueblo di Aruba.