Informacionnan clave di DIARIO riba Venezuela ta haya confirmacion
*Raiz pa retorno di sancionnan Mericano presente den conflicto nobo
*Benta di Citgo a inicia y refugiadonan mester di alternativa pa Merca
ORANJESTAD (AAN) — Cu e situacion den porta di Aruba ta sumamente explosivo y cu indicacionnan robez a wordo crea siman pasa enfrente eleccionnan na Venezuela, tabata e advertencia di DIARIO.
E situacion na Venezuela ta wordo declara peligroso dor di informantenan debi na e hecho cu oficialistanan di e Gobierno di Nicolas Maduro, no ta reconoce e eleccion di e candidato di Oposicion Venezolano, cu mester enfrenta Nicolas Maduro den eleccionnan nacional cu segun acuerdo cu Nicolas Maduro tin cu Merca, mester ta democratico.
Desaroyonan di ultimo dianan ta confirma cu Aruba mester ta alerta sigur pa cantidad di refugiadonan cu lo busca salida di Venezuela, caminda ningun momento democracia a bati a porta.
DIARIO a adverti pa desaroyonan sorprendente na Venezuela, partner importante den e alianza comnunista den e conflicto mundial creciente na Medio Oriente y na Ukraine.
E interes grandi di no solamente paisnan pero tambe di organisacionnan internacional basa riba interes comun di paisnan cu ta forma bloke, ta na wega manera DIARIO a adverti y e situacion na Venezuela sigur ta motibo pa preocupacion grandi.
Problemanan serio cu a parce di ta haya solucion, por rementa cualkier momento ya cu interes comercial grandi ta na wega mundialmente. Interesnan cu nunca a stop di existi for di Siglo 20 y cu sigur ta topa cu mas amenaza for di momento cu na e Conferencia di Clima na Escocia a wordo dicidi cu petroleo ta yega na su fin, loke (manera for di 2021 DIARIO a splica) ta nifica cu economia mundial ta den problema.
Merca a introduci sancionnan contra Nicolas Maduro a base di e dictadura cu a haci cu mas cu7 Miyon Venezolano ya a bandona nan pais. Sancionnan cu a paralisa e entradanan financiero enorme di Venezuela. E rikeza Venezolano durante e dictadura di Chavez y Maduro no a alcansa e Pueblo di Venezuela, cu na gran cantidad a bandona e pais, cu a bira dictatorial.
Opositornan di Comunismo ta resulta den prison y bida di e Venezolano ta bira cada rato mas miserabel.
E supuesto acuerdo cu a wordo alcansa supuestamente entre Merca y Nicolas Maduro siman pasa tabata, cu e lo a habri porta pa eleccionnan liber.
Kico libertad ta nifica pa Chavismo y Madurismo, a bini dilanti ayera ora Machado cu a proclama su mes candidato pa oposicion den supuesto primaria, a cuminsa haya su mes den problema serio.
E Presidente di Asamblea Nacional di Venezuela a rechasa e resultado di primaria electoral cu lo a comberti Machado den lider di e partido di Oposicion.
Informacionnan ta papia di un investigacion penal contra personanan cu a sostene e supuesto eleccion primaria, cu ta wordo considera un fraude.
Informantenan di DIARIO ta papia di un situacion sumamente tenso na Venezuela y cualkier accion di parti di Nicolas Maduro pa bay contra e eleccion primaria y su resultado, lo por resulta den e decision Mericano pa bolbe impone sancion riba Venezuela, cu tur resultado cu esaki lo por tin.
Na mes momento Venezuela como aliado di Rusia, cu Venezuela debe sumanan enorme pa asistencia cu el a brinda, mester sostene e posicion Ruso den conflicto di Ukraine.
Un desaroyo adicional ta e hecho cu Corte di Husticia na Delaware, Merca, a habri porta pa inicio pa venta di Citgo na vindishi, cu lo mester tuma lugar na Juni.
Manera DIARIO ya a publica tambe, Venezuela prome cu Maduro a bisa cu e ta percura pa eleccion democratico, a exigi Merca pa entrega e placa cu Citgo a genera.
Merca no ta reconoce Nicolas Maduro como Presidente di Venezuela y e placa di Citgo ta reserva mientras te cu Januari Merca lo no permiti venta di Citgo pa crea espacio pa ainda Maduro recapacita.
E situacion ta sumamente serio mas ainda debi na e hecho cu refugiadonan Venezolano no por drenta Merca mas sin regla nan papelnan.
Informantenan ta bati alarma pa e realidad aki cu por afecta Aruba, ya cu den e situacion actual na Venezuela, e ansia pa bandona e pais a sigui crece pero portanan di Merca ta cera.
Informantenan a indica cu si Venezuela no respeta e eleccion primaria di Oposicion, e sancionnan por bolbe bira realidad y deshaci di entradanan na petroleo pa Maduro.
Manera ya a wordo bisa, ta spera cu e situacion serio na Venezuela cu un cuadro internacional tambe awor, lo aumenta cantidad di persona cu lo busca refugio inoficial y por aumenta e riesgo di entrada ilegal na Aruba.
DIARIO ta den contacto cu informantenan clave pa informa Aruba sigur rumbo pa 2024 ora Venezuela mester percura pa eleccionnan pa dicidi riba futuro gobernacion di e pais.
