Cuerpo di Bombero a haya e atencion y inversion necesario pa garantisa siguridad di e trahadonan

Parlamentario Alvin Molina (MEP):

ORANJESTAD (AAN): Dialuna ultimo durante conferencia di prensa di Gobierno di Aruba Minister Rocco Tjon a anuncia desaroyonan positivo cu ta tumando luga na Cuerpo di Bombero Aruba. 

            Cuerpo di Bombero a haya e atencion y inversion necesario pa garantisa siguridad di e trahadonan pa asina nan por cumpli debidamente cu trabou y brinda un miho servicio y asistencia na comunidad. Sin lubida e importancia pa nos aeropuerto y consecuentemente nos turismo.

            A inverti den material, uniform, a renoba e central di alarma di brandweer, trucknan y infrastructura. E renobacion di e post na San Nicolas ‘Sierra’ ta premira pa finalisa pa fin di aña 2022.

            Banda di esaki e proceso pa regla e posicion huridico di e trahadonan y a haci palabracion cu companianan Mericano pa duna e bomberonan entrenamento y/of cursonan necesario.

            Tur esaki sigur ta desaroyonan positivo pa pone Cuerpo di Bombero bek riba pia. E bomberonan a pasa door di temporadanan di incertidumbre y pa hopi aña a pasa den diferente retonan grandi den e organisacion. Manera retonan di rechtspositie, retonan di maneho, como tambe retonan di recursonan pa por eherce nan trabou. Brandweer Aruba tin mester di un bon maneho cu un vision bon fiha pa asina e organisacion por funciona optimal y brinda un excelente servicio na nos comunidad.

            Finalisando mi ta felicita Minister Rocco Tjon, Brandweer Aruba como tambe Sindicato di Brandweer SINBA y sin lubida e bomberonan cu e logro aki.