Cuerpo CEA a ricibi cinco vehiculo nobo di transporte for di Hulanda

ORANJESTAD (AAN): Recientemente, Minister di Husticia y Asuntonan Social Sr. Rocco Tjon, a bishita oficina di Cuerpo Especial Arubano (CEA)

pa asina haya un bista di e cinco transportwagens cu a yega na e localidad, directamente for di Hulanda.

   A base di un convenio cu tin existente pa basta aña caba entre Aruba y Hulanda, autonan na Hulanda cu ta den bon estado ta worde traspasa pa Aruba. Den e caso aki, a traspasa cinco transportwagens pa e departamento di CEA, specificamente e unidad di transporte, pa asina nan por haci nan trabao debidamente. Durante e bishita aki minister Tjon a haya un splicacion amplio di e personal di CEA di e transportwagens aki. Ta trata di transportwagens di bon calidad, den e caso aki, Mercedez Benz, cual ta completamente ekipa cu e ultimo den tecnologia y camaranan paden pa e parti di siguridad, pa e preso cu ta worde transporta como tambe e personal.

   E mandatario a expresa di ta contento cu e parti aki a keda finalisa, y durante su combersacion cu e director di CEA esta Sr. Ronny Geerman, a keda conclui cu e ta importante pa yega na un plan structural, caminda e autonan lo bay worde reemplasa cu autonan nobo na tempo. Combersacionnan cu Hulanda ta andando pa por yega na un “vervangingsplan” asina dentro di poco.

   Na final di dia ta trata di inversionnan cu ta importante pa e personal, pa asina nan por haci nan trabao mucho mas miho. Banda di esaki, manera ya a indica for di inicio, e prioridad di e maneho di Ministerio di Husticia y Asuntonan Social ta pa inverti den e personal y percura pa nan tin e materialnan necesario pa nan por haci nan trabao debidamente y na un manera hopi mas sigur.