Cuatro lora chikito di Aruba a nace te na Hulanda

ORANJESTAD (AAN): E ta un informe cu lo yena curason di tur yiu di tera!  Algo cu a socede miles di kilometer for di Aruba,

cuater baby Lora a nace na ciudad di Alphen aan den Rijn, cu ta situa poco pariba di Leiden na Hulanda.  Aruba Conservation Foundation a divulga esaki, y a splica cu el a socede cerca nan partner di conservacion Vogelpark Avifauna.

   Na e Parke Hulandes aki, nan a marca un otro paso yen di speransa den un historia mucho mas grandi, cual tabata posibel door di nan colaboracion di 10 aña cu Aruba Conservation Foundation.

   Lora tabata biba libremente na Aruba, pero presionnan manera perdida di habitat y comercio ilegal di animalnan salvahe a contribui na su desaparicion for di e isla. Awe, a traves di esfuersonan di conservacion aki na Aruba y colaboracionnan internacional, tin e oportunidad pa yuda skirbi un capitulo diferente.

   E cuater baby Lora nan aki ta forma parti di un programa internacional di cria pa conservacion, cu ta traha pa mantene un poblacion di Lora saludabel y geneticamente diverso. Si tur cos bay segun plan, nan tambe lo haci e biahe pa Aruba y contribui na e poblacion creciente di Lora den naturalesa.

   Ta importante pa note cu aunke nan responsabilidad ta pa proteha e naturalesa aki na Aruba, naturalesa mes no conoce frontera.

   Y conservacion no ta termina ora un especie bolbe cas. Su futuro tambe ta depende di e decisionnan cu nos ta tuma aki. Door di no cumpra, tene of sostene comercio ilegal di Lora, duna nan e espacio cu nan mester den naturalesa y proteha nan habitat, nos tur por contribui na duna e especie aki un oportunidad real pa prospera.

   Loke ta sosode miles di kilometer for di nos por crea un efecto cu finalmente ta yega nos tera. Un colaboracion por habri porta pa un posibilidad. Añanan di trabou colectivo por resulta den cuater bida chikito. Y e cuater bidanan ey por representa un otro paso pa restaura un especie na e luga cu un tempo e tabata yama cas.

   Aruba Conservation Foundation (encarga na Aruba cu Parke Arikok), ta gradici Vogelpark Avifauna y tur e partnernan cu ta sigui comparti nan conocemento, dedicacion y cuido den e trayecto aki, y tur hende aki na Aruba cu mediante nan propio decisionnan, ta yuda proteha e progreso cu nos ta logra hunto pa naturalesa.

   Tin biaha, e efecto crea door di esfuersonan di conservacion, ta duna nos tur motibo pa sigui pa dilanti cu speransa.  E imagennan aki pa cortesia di ACF Aruba.