Señor Rino Hermans di CMO:
ORANJESTAD (AAN): Director di Crisis Management Office (CMO), señor Rino Hermans, a enfatisa den un entrevista reciente cu DIARIO cu e organizacion ta constantemente prepara pa responde na cualkier calamidad cu por afecta Aruba.
Pa loke ta trata temporada di horcan, Hermans a splica cu, aunke Aruba generalmente no ta wordo impacta directamente pa horcannan, e isla si por experimenta nan efectonan indirecto. Un di e riesgonan principal ta awacero fuerte y prolonga, cu por causa inundacion na diferente parti di e isla. Segun Hermans, esaki ta un di e riesgonan mas significativo pa Aruba, specialmente considerando cu tin cuatro zona identifica cu ta mas vulnerabel pa bay bou di awa.
El a indica cu desde 15 di mei CMO ta den preparacion y ta monitorea desaroyonan meteorologico regularmente. E meta ta pa, den caso di un situacion di emergencia, Gobierno y tur instancia concerni por actua na tempo y coordina nan reaccion pa stabilisa e situacion lo mas rapido posibel.
Hermans a remarca cu Departamento Meteorologico Aruba (Meteo) ta e instancia oficial encarga cu pronostico y informacion tocante condicionnan di tempo. CMO, pa su banda, ta sostene e informacion di Meteo y ta mantene comunidad informa via su website y plataformanan di social media. Ademas, tres biaha pa siman CMO ta comparti regularmente informacion tocante e condicionnan cu por wordo spera.
Durante temporada di horcan, cu ta extende te cu november, Hermans ta recomenda comunidad pa sigui principalmente informacion proveniente di fuentenan oficial. Esaki ta particularmente importante pa evita confusion of informacion incorecto durante un posibel situacion di emergencia.
Segun e director di CMO, un horcan ta un di e menazanan cu por wordo pronostica cu suficiente anticipacion. Den caso di un posibel menaza pa Aruba, CMO lo inicia su comunicacion aproximadamente 120 ora, esta cinco dia, prome cu e momento cu calcula cu e horcan por pasa den cercania di Aruba.
Durante e diferente fasenan di preparacion, autoridadnan lo informa comunidad tocante medidanan cu ta necesario, incluyendo decisionnan relaciona cu apertura of ciere di scolnan den caso di awacero torencial of otro condicion peligroso.
Hermans su mensahe principal pa comunidad ta pa keda prepara, sigui desaroyonan atentamente y basa decisionnan riba informacion oficial. Un reaccion efectivo durante un calamidad no ta depende solamente di autoridadnan, sino tambe di un comunidad cu ta debidamente informa y cu sa con pa actua ora un situacion asina presenta.
