Cuater atleta di Stingray Swimming ta parti di Seleccion di Aruba pa AAF pa CARIFTA 2025

Despues di varios luna di training intensivo:

ORANJESTAD (AAN):  Den menos di 10 dia, nos talentoso 4 atletanan di Stingray Swimming lo representa Aruba cu orguyo na e gran evento di landamento di Caribe: CARIFTA 2025 na Trinidad y Tobago. E evento ta tuma lugar for di 19 te 23 di april, unda e 4 atletanan: Vitaly Innocencia (11 aña), Leandro Santiesteban (12 aña), Shine van Loon (12 aña) y D-Leylah Gerrel (13 aña) ta forma parti di e seleccion di Aruba; Aruba Aquatics Federation (AAF), cu ta competi na e prestigioso National Aquatic Centre na Couva, hunto cu e otro landadornan di Aruba Dolphins y Giants Aquatics.

            CARIFTA 2025 ta conta cu mas di 1,200 atleta di 28 pais den Caribe, unda sigur por conta cu competencia di nivel. Stingray Swimming ta orguyoso di su 4 landadornan hoben aki, cu sigur tin aspiracion grandi pa bira futuro landadornan den competencia mas grandi.

            E cuater atletanan aki Vitaly Innocencia, Leandro Santiesteban, D-leylah Gerrel y Shine van Loon ta competi den diferente evento individual como Relay.

- Vitaly den 7 evento individual: 100m – 200m Breastrstoke / 50m Fly / 200m IM / 50m – 100m – 200m Freestyle.

- Leandro den 6 evento individual: 50m – 100m – 200m Breaststroke / 50m - 100m Freestyle / 50m Fly.

- Shine den 6 evento individual: 50m – 100m Freestyle / 50m – 100 Backstroke / 50m Fly /  50m Breaststroke.

- D-Leylah den 7 evento individual: 50m – 100m – 200m Backstroke / 50m – 100m – 200m – 400m Freestyle.

            Tur 4 landador ta bon prepara pa e duo di coach dedica Ismael Santiesteban y Tyrine de Kort, cu sigur a percura pa nan trainingnan ta cla pa enfrenta e reto di Caribe di mas grandi y logra mehoracion personal, medaya y finalista representando nos dushi isla Aruba.

            Aruba tambe por sigui e competencia completo via live streaming. Ban sostene y aplaudi nos atletanan, cu sigur despues di varios luna intensivo di training, sacrificio, dedicacion y amor pa nan deporte ta cla pa representa Aruba y nan team di Stingray Swimming.