Gino Frans di Stichting Eliezer La Posada:
ORANJESTAD (AAN) – Gino Frans, di Stichting Eliezer La Posada, a menciona cu nunca por bisa un cantidad di tempo cu lo tuma pa un persona adicto rehabilita den un Clinica. Esaki ta algo individual, kiermen, e ta depende di cada persona. Tin cu mester dos aña, tin cu mester menos tempo.
Frans a bisa cu e tin entendi cu tin un par di hende ainda na Colombia, cu tin su tempo aya y no por bin Aruba ainda, y aki por mira cu e trayecto ta largo.
Tocante e cinco hobennan cu a subi avion siman pasa, pa bay e clinica na Colombia, Gina Frans a bisa cu e ta contento cu nan a bay, y cu por a mira nan mayornan tambe cu cara contento.
El a expresa cu nan ta cinco persona menos riba caya, y comercio ta bay haya un sociego. Gino Frans a comenta cu La Posada ta traha na otro sistema. Nan ta un cas Cristian y nan sa cu Dios por yuda e adictonan, pero si nan mes no kier nan no por wordo forza. Si nan kier traha den un boerderij, si nan no kier traha cu bestia, ni cu mata, e ora ey ta nifica cu nan no por wordo yuda. “Pero si mi tende cu tin otro lugar cu si por yuda bo mi ta apoya bo. Y esey ta locual a sosode. Tabata tin un samenwerking tremendo, cu Aruba no conoce hopi, pa apoya e muchanan aki. Mi no ta worry ken a haya subsidio y ken no, ban wak e persona si e por wordo yuda. Tin un departamento cu ta controla esnan cu ta bay Colombia. SPD ta haci esaki, y na momento cu tin un grupo atrobe ta bay, mi ta bay tuma nan atrobe”, Gino Frans a señala.
El a agrega cu tin un par di cos chikito cu a bay fout, y cu e lo sinta cu DVG pa drecha esakinan, pa La Posada bira miho, miho y miho. “Pasobra e porta di nos centro Eliezer lo keda habri pa yuda prepara nan, pa nan bay den exterior”, Gino Frans a conclui.
