Aruba a pone krans na conmemoracion di 30 aña di tragedia di Bijlmer

ORANJESTAD/DEN HAAG (AAN): Na e monumento "Het Groeiend Monument" a tuma lugar ariba diamars 4 di October e conmemoracion anual pa e victimanan di e tragedia di Bijlmer .

E aña aki ta 30 aña pasa cu un Boeing 747 di carga di EL AL a cai den e flatnan Groeneveen y Klein-Kruitberg. E tragedia a exigi bida di 43 persona, di cual 12 Arubiano. Directora a.i. di Arubahuis Glenda Hernandez a pone un krans den nomber di Gobierno y pueblo di Aruba.

    Prome cu e ponemento di krans tabata tin un programa special den e CEC-gebouw den Bijlmer. Akinan e burgemeester di Amsterdam Femke Halsema a tene un discurso. Burgemeester Halsema a papia den su discurso di e dolor cu te ainda ta biba bou di e habitantenan di Amsterdam-Zuidoost. “Ela bisa tambe cu e tragedia a haci e hendenan mas sigur di nan mes. “E tragedia a contribui na un geneneracion di hende cu a haci di Zuidoost un  mihor lugar”. Halsema a bisa cu e tragedia di Bijlmer ta un “herencia di tur Hulandes”.

   Den nomber di Gobierno di Hulanda a hiba palabra Secretario di Estado di Infrastructura Vivianne Heijnen unda ela bisa cu e tragedia “ta un cicatriz riba e alma di Hulanda”. Aunke cu e avion a cai na Amsterdam-Zuidoost “e por a cay cualkier otro parti di Hulanda”. Destino no ta dicidi esey. Esaki ta un tragedia cu ta dal nos tur. Y pa scur e por ta, semper tin un rayo di luz unda hende ta encontra, yuda y consola otro, segun palabranan di Heijnen.

  E discursonan a keda interumpi cu musica di e Coro di mucha di scol basico Crescendo, presentacion di violista Shauntell Baumgard. E parti musical a keda cera pa un presentacion di ZO! Gospel Choir.

   For di e CEC-gebouw a sigui un march silencioso pa e “Het groeiend Monument”. Extacmente 6'or y 35 minuut - momento cu a avion a cai den Bijlmer na 1992 - a tene un minuut di silencio pa recorda e victimanan. Despues a sigui e ceremonia di ponemento di krans. 

Potretnan ta cortesia di Arubahuis