Na 2021 Eagle LNG a rementa un misterio internacional di decada --- Mike tabata kier energia limpi na 2020 pero a busca Citgo na 2016 --- Mike cu Branson, Gasunie y Valero na man pero na 2017 ta busca oferta
ORANJESTAD (AAN)- Kico e problema cu Eagle LNG tabata? Pakico tanto problema pasobra Prome Ministro Evelyn Wever-Croes a introduci un proyecto cu mester haci prijs di awa mas barata pero tambe ta haci Aruba un stacion di Eagle LNG pa entrega di gas, cu na e momentonan aki ta e combustibel mas importante den region di Caribe?
Ora ta papia di negoshi di gas na Aruba, ta papia di un decada di negociacionnan di Gobierno cu companianan pa trece gas pa WEB Aruba NV.
Na 2021 den Parlamento di Aruba, e fraccion di AVP tabata dedica masha atencion na e ganashi cu Eagle como compania, cu mester biba di ganashi, lo haci.
Nos a repasa henter e asunto di gas for di momento cu Mike a bay brasa Hulanda pa declara Aruba appendix di Hulanda den Caribe pa despues Hulanda mes haci cu e mester a bay sconde den Fort Zoutman.
Nos mester papia asina, pasobra henter e asunto di gas na Aruba for di 2011, tin un sabor sumamente misterioso, cu no ta cuadra cu democracia.
Cuanto contract Mike a cera pa gas yega Aruba?
Parlamento di Aruba tin un deber pa averigua, kico a pasa cu contractnan y sigur palabracionnan cu lo mester tin si sigui tur loke Mike a papia y propaganda for di 2011 ora el a bay Aruba un “handelscentrum” di Hulanda.
Cuanto placa tabata envolvi den tur e asuntonan aki?
Mundo a habri un porta pa Mike cana ora for di 1979 e organisacion mundial di meteorologia a cuminsa papia di peliger cu clima por bira pa hende.
Mundo a cuminsa reuni riba e tema despues di tempo y na 2008 por mira con 2050 ta bira e aña cu mundo por sigui cana of cu mundo lo a bira calamidad.
Ora Mike a haya poder na Aruba, e asunto di clima tabata importante y Mike a gara e asunto aki pa haya cantidad di entrevista den exterior, wordo proclama como homber di sabiduria inmenso tur caminda, pero Aruba a keda sin resultado.
E palabracionnan di Mike y Gasunie tin un contracto? Sir Branson a atende cu Aruba pasobra Mike ta brasa hende? Kico documentonan ta bisa?
Kico Aruba mester a paga pa Gasunie bini?
Interesante ta cu for di 2011, ya Mike a bisa cu na 2020 Aruba lo tabata depende completamente di combustibel limpi a base di energia di biento y solo entre otro.
Tin contracto firma y paga cu tur e hendenan cu el a bisa ta bay haci algo? Tin contracto cu Gasunie pa gas y cu Anthony Veder pa transporta gas?
Si no ta asina di kico Mike a papia?
Cuanto placa a inverti den ekipo di WEB sin destaho? Pakico no a tene un destaho?
Mas investigacion haci, mas ridiculo pero misterioso henter e asunto ta bira.
Cuanto placa Gasunie lo a cobra pa bini mientras Aruba lo mester a traha e terminal cu awor Eagle LNG ta bay construi? Mike tabata kier a haci loke awe Prome Ministro Evelyn Wever-Croes a haci.
Un decada largo di negociacion Aruba mester a soporta di Mike Eman y su grupito den situacionnan cu ni un mucha chikito lo no a crea.
Naturalmente no tabata placa di Mike ni su grupo atrobe, pero placa di Aruba cu tabata den wega den asuntonan cu mester wordo investiga.
Si Mike tabata tin acuerdo cu Gasunie y Anthony Veder, si tabata tin acuerdo pa companianan di gas, pakico na 2017 Gasunie, WEB y Ulities kier a haya ofertanan pa un proyecto cu Mike kier a realisa na 2020?
E parti mas gracioso ta, cu Mike tabata kier un Aruba basa riba combustibel limpi for di 2020. Pero Mike a bay atrae Nicolas Maduro pa un refineria, cu awe Quanten kier comberti den refineria pasobra Lago no ta refineria.
Di kico Mike a papia ayera, awe y simper?
Kico tabata e ganashi cu Gasunie kier a haci como “equity partner” den asunto di gas?
DIARIO lo sigui investiga tur loke for di 2011 a pasa riba tereno di gas na Aruba y nos ta sigui exigi pa wordo investiga.
