ORANJESTAD (AAN): Banco Central di Aruba (BCA) a publica su “Operational Report 2020” y “Condensed Financial Statements 2020”.
E rapport nan aki ta contene un resumen di e resultado financiero di BCA pa 2020, e logronan mas importante relaciona cu su plan strategico “Bela Yen: Nos Plan Strategico 2016-2020”, e desaroyonan y actividadnan principal riba tereno monetario y sistema di pago, hunto cu actividadnan operacional primario ehecuta door di BCA durante 2020.
Na 2020, BCA su enfoke principal tabata pa mantene un nivel apropia di e reservanan internacional na tur momento pa asina mantene e tasa fiho di e florin pa cu e dollar Americano y promove stabilidad financiero. Esaki teniendo na cuenta un contraccion fuerte den e entradanan di divisa for di turismo, como consecuencia di e medidanan introduci door di Gobierno di Aruba pa contene e propagacion di e virus Covid-19.
Na su turno, BCA a tuma varios medida riba tereno monetario, prudencial y divisa. E medidanan di divisa aki, tambe fortifica door di fiansanan externo di Gobierno di Aruba, incluyendo for di Hulanda, a mitiga e impacto negativo riba e reservanan internacional.
Consecuentemente e reservanan aki a permanece na nivel adecuado durante 2020, y na mes momento e likides di e sistema bancario tambe a keda na nivel apropia, incluyendo otro indicadornan prudencial importante, cual a contribui na mantene stabilidad di e sector financiero y asina e confiansa den e florin.
En bista di e desaroyonan aki, como tambe e recuperacion fuerte di e sector di turismo y perspectiva economico positivo, desde 1 di september 2021, BCA a revoca tur restriccion di divisa impone, como tambe e medidanan prudencial riba e banconan comercial. Alabes, desde september 2021, teniendo na cuenta e nivel hopi halto di likides den e sector bancario y e aumento den inflacion, BCA a restringi su maneho monetario door di hisa e tasa di e “reserve requirement” pa e banconan comercial, cual a alcansa e nivel di 12 porciento desde 1 di december 2021.
Aña 2020 tambe a marca e final di BCA su plan strategico “Bela Yen: Nos Plan Strategico 2016-2020”. Durante e periodo aki, BCA a enfoca pa ta un banco central prominente den e region, ehecutando su tareanan na un manera eficiente y enfocando riba resultado y pa ta un organisacion atractivo pa e miho talentonan.
BCA a completa varios iniciativa strategico den areanan di sistema di pago, “corporate governance”, supervision, siguridad di informacion y sistema di informacion. Un logro importante durante 2020 tabata e lansamento di e ‘Instant Payment Clearing and Settlement Mechanism’, miho conosi como I-Pago, den colaboracion estrecho cu e banconan comercial. E plataforma aki a percura pa ehecuta e pagonan local entre banconan comercial den un par di seconde. E sistema I-Pago ta disponibel 24 ora pa dia, 365 dia pa aña. Esaki tabata un logro importante, specialmente durante e pandemia di Covid-19, unda cu pago sin contacto a bira esencial pa nos comunidad.
Door di a reduci su gastonan por medio di vigilancia estricto di su presupuesto, BCA su posicion financiero a keda solido durante 2020, generando un ganashi netto di Afl. 28.4 million. E entrada netto di interes, BCA su fuente primario di entrada, a baha durante 2020, reflehando e desaroyo negativo di interes riba mercado financiero Americano causa door di e pandemia di Covid-19 como tambe medidanan tuma door di “Federal Reserve” na Merca pa baha interes. Gastonan di personal y gastonan operacional di BCA baha den 2020 door di reduci, entre otro, vacatura y pospone diferente proyecto.
BCA kier gradici tur su stakeholders pa e cooperacion ricibi durante 2020 y 2021 y ta desea e comunidad di Aruba un feliz y prospero aña 2022.
E Operational Report 2020 y Condensed Financial Statements 2020 ta disponible desde awe riba BCA su website.
