Randall van Trigt ta kere cu mester prohibi vaping na Aruba
ORANJESTAD (AAN): Randall van Trigt di Stichting Hunto a expresa su preocupacion tocante uzo di vape entre hobennan na Aruba y a indica cu, segun e posicion cu el a expresa, mester prohibi vaping na e isla.
Van Trigt a haci e declaracionnan den cuadro di e di tres edicion di conferencia “Breaking the Silence”, organisa door di Stichting Hunto y Directie Volksgezondheid (DVG) na Renaissance Convention Center.
Durante e conferencia, Caroline Becker, docter di pulmon na Horacio Oduber Hospital, a presenta informacion tocante vaping y dependencia di nicotina. Pa ilustra e cantidad di nicotina cu un vape por contene, el a uza un ehempel pa compara un vape di 600 puffs cu dos paki di sigaria. E cantidad di nicotina ta varia segun e producto.
Segun Van Trigt, e presentacion a sorprende varios participante cu no tabata consciente di e riesgonan. El a expresa preocupacion cu muchanan ta cuminsa experimenta cu vaping na un edad jong y a subraya e necesidad pa proteha nan contra dependencia.
Segun Van Trigt, Stichting Hunto su pensamento ta cu mester prohibi vaping na Aruba. Segun el a indica, vaping no tin niun beneficio cu no ta financiero pa Aruba. No solamente vaping, pero tambe alcohol y sigaria cu tambe ta trece hopi placa aden pa nos economia.
“Cuanto nos ta dispuesto pa sacrifica nos yiunan dijes pa placa pa nos pais?”, Van Trigt ta questiona cada ciudadano y mandatario.
