Yvonne Lee-Perez di Directie Arbeid en Onderzoek (DAO):
ORANJESTAD (AAN): E Encuesta Laboral 2026 ta resultado di un colaboracion di 11 aña entre Banco Central di Aruba, Oficina Central di Estadistica y Departamento di Labor y Investigacion. Segun Yvonne Lee-Perez di Directie Arbeid en Onderzoek (DAO), e investigacion conhunto ta atende e necesidadnan di informacion di tur tres instancia.
Lee-Perez a splica cu e obhetivo principal ta pa obtene datonan actual di mercado laboral di Aruba. Como e mercado ta cambia continuamente, ta realisa e encuesta anualmente pa por sigui e desaroyonan. E informacion colecta no ta sirbi solamente e tres instancianan, sino tambe ta wordo comparti cu Gobierno, stakeholders y organisacionnan internacional cu ta rekeri e datonan aki.
El a señala cu un encuesta asina ta trece gastonan considerabel. Door di uni esfuerso y comparti recursonan, e tres instancianan por sostene e investigacion y obtene informacion relevante pa Aruba.
E colaboracion, sinembargo, ta bay mas leu cu e aspecto financiero. Segun Lee-Perez, tur tres instancia ta participa den planificacion y ehecucion di e encuesta, incluyendo e metodo di investigacion, seleccion y revision di preguntanan, y determinacion di prioridadnan. Nan ta traha hunto tambe den publicacion di e resultadonan.
E encuesta ta enfoca pa identifica tres grupo principal: personanan cu ta traha, personanan desemplea cu ta busca trabou, y personanan cu no ta activo riba mercado laboral, manera pensionado y studiante.
Pa obtene un bista lo mas completo posibel di e situacion laboral, encuestadornan lo bishita 4.000 hogar selecciona rond di Aruba. Participacion di e hogarnan aki ta fundamental pa colecta datonan confiabel cu ta refleha e realidad di mercado laboral.
