Cu un exposicion interesante a celebra 40 aña di Hemodialisis na HOH

ORANJESTAD (AAN) – Hospital dr. Horacio Oduber a presenta un exposicion den su Afdeling di Hemodialisis, en ocacion di a conmemora e di 40 aniversario, cu e prome pashent a ricibi dialisis na HOH.

Rachel Kraaijvanger a duna un relato pa tur  presente, entre nan e miembronan di prensa, y a comenta cu e prome caso a haya servicio di dialisis  den un camber masha chikito, ubica hopi cerca di ICU.

Asina a cuminza cu un cama, y awendia tin 23 cama den e sala grandi, y e servicio a expande cu pre-dialisis, acute-dialisis y peritoneal-dialisis.

Rachel Kraaijvanger a menciona cu nan a lanta un comision chikito pa e celebracion, pero door di e pandemia no tabata sa di ki manera haci esaki, anto a dicidi di organiza un exposicion, cu ta conta e historia di 40 aña te cu aworaki, cu e sala di Dialisis a habri na Hospital. Durante e exposicion, un dietista a mustra con diferente producto gusta den pueblo, ta yena cu salo. Tambe a mustra e aparato mas nobo cu tin den e sala di dialisis.

Rachel a expresa palabranan di pabien na henter nos comunidad, pasobra si lo no tabata tin e servicio di Hemodialisis na Aruba, lo mester a manda e pashentnan afo.

El a gradici di curazon na e enfermeranan cu e tempo ey, bao guia di docter Oswald Wever, representa pa señora Wisha Ponson, door cu dr. Wever ta sufri di un kebranto di salud. Docter Wever hunto cu e enfermeranan a forma e team e momento ey, pa cuminza cu Dialisis.

El a menciona tambe un di e prome tecniconan local cu awo ta su man drechi, cu ta señor Eddy van Nes, ken sa e historia di e prome aparato cu Hospital a adkiri pa hemodialisis, y cu ta hopi pisa mientras cu esun mas nobo ta hopi liviano.