Mediador Anselmo Pontilius:
ORANJESTAD (AAN) Mediador Anselmo Pontilius, den entrevista cu DIARIO a duna di conoce cu e Sindicato UEA a pidi, formalmente, un referendum, y FTA a publica loke Ley ta rekeri. Pero mientras tanto, cu e partidonan na mesa y pruebanan tambe, a propone pa bin un reconocemento di e sindicato como esun mayoritario y, finalmente, e gerencia a trat’e internamente, locual no ta inusual.
E partidonan a palabra cu Diamars otro siman, e partidonan lo firma, formalmente, a acuerdo di reconocemento, unda cu na luga di tin un referendum, e compania ta considera UEA como mayoritario, pa motibo cu tin e pruebanan caba.
Pontilius a splica cu den e caso aki entre 120 cu 130 trahado ta cay bao di e contrato colectivo, y mas of menos 80/90 a bira miembro di sindicato UEA.
El a aclarea cu den e caso aki no tabata tin ningun problema, tin un contrato colectivo vigente cu a wordo firma pa Sindicato STA, pero tabata tin negociacion cu tur dos sindicato, y e diferencia ta cu e trahadornan ta regl’e mediante esun mayoritario cu ta haya autoridad pa negocia e contrato colectivo. Mediador a splica cu e reconocimento ta bay cu prueba di formulario firma pa cada miembro, y cu e compania tambe ta haya esey como comprobante. “Esaki ta e unico forma, y kizas e compania no ta haye esun di mas eficiente, pero no ta prome vez cu un compania ta negocia cu un of mas sindicato”, Anselmo Pontilius a menciona.
