Parlamentario Carlos Bermudez (AVP):
ORANJESTAD (AAN): Aunke Gabinete AVP-FUTURO tin solamente 11 dia den funcion, el a tuma pasonan inicial caba pa e cambionan cu pueblo di Aruba ta desea. Cambionan cu ta delinea claramente den e Programa di Gobernacion 2025–2028.
Mehorando Poder di Compra
Un di e precupacionnan mas urgente cu ta resona den henter nos comunidad ta e costo halto di bida. Ciudadanonan ta wordo forsa pa haci escogencia dificil tocante kico nan por y no por permiti nan mes. E situacion aki ta specialmente dificil pa nos pensionadonan, hopi di nan ta lucha pa cubri gastonan mensual, pa no papia mes di spaar suficiente pa hiba un biba cu dignidad y un situacion financiero sano.
Durante e tratamento di presupuesto 2025 gabinete AVP-FUTURO a anuncia cu entrante 1 di mei 2025, tur pensionado lo cuminsa haya un reparatietoeslag di 250 florin pa luna. E iniciativa aki ta marca e comienso di esfuersonan pa impulsa e poder di compra di nos pensionadonan.
Parlamentario Bermudez ta expresa cu e necesidad pa ayudo ta bay mas leu cu e pensionadonan. Tin otro gruponan vulnerabel cu tambe ta den necesidad pa un ayudo financiero urgente.
Gabinete AVP-FUTURO, pa medio di su Programa di Gobernacion 2025–2028, a compromete cu algun punto di accion pa mehora poder di compra, entre otro:
- Diseña y implementa un Plan "Plan Poder di Compra" cu ta dirigi riba pensionadonan, trahadornan di entrada abou (Salario minimo) y individuonan cu no por traha pa motibo di limitacionnan fisico of mental.
- Gradualmente aumentando e reparatietoeslag pa pensionadonan mas leu cu e 250 florin inicial.
- Formalisa e ampliacion di e belastingsvrijevoet reduciendo asina e cantidad di ciudadanonan cu mester entrega impuesto riba entrada.
- Formalisando e reduccion di loonbelasting, cu a wordo introduci na comienso di aña.
- Implementa e Ley di Regulacion di credito pa consumido (Regeling Consumentenkrediet) pa proteha consumidonan di interesnan halto cu e meta pa al final contribui na un posicion financiero sano.
Un punto cu a capta e atencion di parlamentario Bermudez ta e compromiso di Gabinete AVP-FUTURO pa analisa y fiha e nivel di entrada cu lo considera e linea di pobresa oficial pa Aruba.
Bermudez a expresa e speransa cu Parlamento pronto lo haya un update riba inicio di e analisis aki y e timeline pa presenta e plan completo (Plan Poder di Compra) pa asina Parlamento por brinda e supervision y sosten necesario.
Ayudo financiero na fundacionnan
Durante e tratamento di presupuesto 2025, oposicion a entrega un mocion caminda ta pidi sosten financiero pa varios fundacion cu ta traha riba proyectonan di conscientisacion social y asistencia na comunidad.
E mocion a pidi ayudo financiero pa e siguiente fundacionnan:
- Fundacion Respetami (Abuso di Mucha);
- Famia Planea Aruba (Salud Sexual);
- Stichting HUNTO (Salud Mental y Sosten psychatrico);
- Fundacion Anti Droga Aruba (information Adiccion\Droga\Alcohol\Salud Mental);
- Fundacion Contra Violencia Relacional.
Bermudez ta confirma cu fraccion di AVP a considera e peticion valido pero ta di opinion cu lo mester duna Gabinete AVP-FUTURO e espacio mirando cu Minister Geoffrey Wever a expresa sosten pa e proposicion pero a enfatisa cu Gabinete AVP-FUTURO ta desea di revisa e documentonan existente pa por evalua e sumanan pidi debidamente promer cu bay over na aloca e sumanan necesario.
Tambe Bermudez ta reconoce cu hopi mas organisacion tin mester di ayudo financiero. No obstante esey, e ta haya cu mester duna Gabinete AVP-FUTURO e espacio pa por opera efectivamente y sigui e proceduranan adecuado.
Parlamentario Bermudez lo sigui vigila e esfuersonan di Gabinete di serca pa por sigui informa pueblo debidamente.
Al final ta spera cu e fundacionan lo haya e ayudo financiero necesario.
