Cu irisGO ta mas facil pa capta tur e problemanan cu tin riba caminda

Daryl Lue di DOW

ORANJESTAD (AAN): Daryl Lue, hefe di Maneho di Infrastructura di DOW a splica cu aña pasa DOW a introduci irisGO un camara cu ta wordo instala riba dashboard di nan vehiculo pa asina nan por wak e areanan cu tin kehonan. Lue a indica cu nan tin dos aparato irisGO na Aruba. Nan a instala un di nan y cu solamente esaki, nan tin alrededor di 200 werkorder habri. Cu irisGO ta mas facil pa capta tur e problemanan cu tin riba caminda, por ehempel, sushi, debris y buraco, cu e camara ta capta y ta registra di biaha den e sistema.

Lue a bisa cu den luna di december nan test e sistema, na unda nan a core rond y wak kico e sistema ta capta y esaki a bay hopi bon.

Den luna di januari y februari, DOW lo instala e di dos camara di irisGO den un auto y asina cuminsa inventarisa ful Aruba, cu ta inclui caminda, lus, banki na banda, enz...y lo traha un evaluacion. Manera cu nan keda cla, DOW lo cuminsa inspecciona e areanan y transferi den nan sistema y asina e trahadornan por tin e datonan di biaha den nan telefon y traha na e manera mas eficiente cu ta posibel.   

Pa 2025 nan lo cuminsa usa e datonan recopila pa e sistema, specialmente e camindanan cu mester wordo asfalta, na unda nan lo controla e cantidad di kehonan y e mal estado di e caminda. Nan tin tur caminda di santo registra y nan lo match esaki cu e bouwvergunning y controla si e camindanan ta haya mas prioridad pa haya asfalt.  Nan lo tene na cuenta ful e bario y e area, cu mester ta alrededor di 80% bebouwd caba pa bin na remarca pa haya asfalt.