Ing. Daryl Lue, Hefe Infrastructura DOW:
ORANJESTAD (AAN) — Ing. Daryl Lue, Hefe di Infrastructura di Departamento di Obranan Publico (DOW), a splica tambe, den entrevista cu DIARIO, cu varios biaha nan a haci investigacion di asfalt friu si e ta bon of no, y den caso di emergencia semper por hacie pa cera un buraco hopi mas lihe.
No obstante e garantia no tey cu si pone awe y awe ta yobe e ta keda wanta. “E ta keda mesun procedure y den e caso aki e asfalt friu ta costa mas hopi cu e asfalt cu nos ta ricibiendo y eynan nos ta ‘overview’ con nos ta ricibie. Den e caso aki nos tin palabracion cu Arubaanse Wegenbouw pa nos tin asfalt, na un prijs un tiki mas barata y den e caso aki mi ta monitor cu e tiki placa cu nos tin pa mantencion, mi no lo bay cu asfalt frio pasobra e no ta rindi asina hopi”, ing. Daryl Lue a señala.
E hefe di infrastructura di DOW ta sigui bisa cu nan tin un lista y den e presupuesto supletorio a wordo aproba un suma di 18 miyon florin, cu ta reserva pa mantencion di caminda.
DOW ta inventariza tur caminda y locual nan ta bay enfoca ta tur e camindanan principal, pasobra esey nan ta wordo mas uza, anto despues ta bay drenta den e barionan.
El a agrega cu e prioridad ta mas halto riba caminda grandi, unda e automobilistanan ta core hopi duro, y por dal y cap e tirenan. Den un parkinglot e velocidad ta hopi abao, por ehemplo. Pero nan ta haci evaluacion tambe riba e stacionamentonan, y esun cu ta haya mas control ta esun di e parlamentarionan. Akinan tambe DOW ta evaluando kico y con nan ta bay haci y kico ta e miho manera pa haci cu ne.
Esaki ta riba agenda di un debe, pa wak kico ta e posibilidadnan pa wak con por mantene e parkeonan door cu nan ta wordo hopi uza pa hende local y turistanan.
