Cu hopi curason a celebra e di 200 aniversario di Aruba su ciudad Capital: Oranjestad

Na un manera bunita:

ORANJESTAD (AAN) – Manera ta conoci, Diasabra ultimo, esta 24 di Augustus, a tuma lugar e celebracion di e 200 aniversario di existencia di e Ciudad Capital di Aruba: Oranjestad (1824-2024).

            E ceremonia a tuma lugar na Plaza Nikki Habibe y a cuminza cu interpretacion di Himno Nacional “Aruba Dushi Tera” den e bunita voz di un hobencita. Robert Jeand’or a fungi como MC.

            Seguidamente a yama bin dilanti na señor Clifford Rosa, presidente di Stichting Rancho, ken a traha incansablemente pa e celebracion di e Bicentenario di nos ciudad di Oranjestad.

            Clifford Rosa a expresa palabranan di bon bini na tur e personanan presente; el a bisa cu esaki ta e cuminzamento di un proceso cu ta bay dura desde e dia aki te futuro. Esta e celebracion di 200 aña di e Capital di nos pais Oranjestad, cu ta e cuna di e historia di nos pais.

            Rosa a gradici yama dilanti e otro miembronan e Bestuur di Fundacion Rancho y a splica cu, como fundacion, nan ta trahando pa conserva e historia y cultura di e bario di Rancho. “Pero sigur e celebracion di 200 aña ta bay yuda nos sigui enfoca riba esaki, mirando cu e pandemia pa nos tabata hopi fastioso, pero kico nos por a haci? E celebracion di e 200 añanan ta mantene nos bibo y trahando nos ta logra enaltece nos historia”, Clifford a menciona, y a mustra su mes contento cu e presencia di e publico unda a conta cu hopi hoben tambe.

            El a introduci e miembronan di e directiva di e Fundacion, Sra. Yosmar Maduro-Sneek y Sr. Gerald Franca y a expresa cu hunto nan ta traha como un team pa mas di 10 aña traspasando e conocemento y e responsabilidad.

            El a subraya cu con cu bay bin ta un responsabilidad di nan como Fundacion di a logra haci loke den e ocasion aki nan a haci. El a bisa cu e fecha no ta tur cos, ta gewoon un fecha, pero e ta un periodo di Augustus di 1824 pa 2024 y cu ta algo pa reflexiona y mira bek pa e futuro di Oranjestad.

            Riba combinacion di potret por observa parti di e celebracion di e Bicentenario di Aruba su Ciudad Capital: Oranjestad.