ORANJESTAD (AAN): Como cu e pelicula E Bruha, Bruhá a gana e premio prestigioso “Kadushi di Oro” 25 di Krioyo Film Festival na Corsou, productor Desiree Croes a tene un anochi unico na su cas pa su elenco por a celebra e exito.
Cada un di e actor- y actrisnan principal, esta Yvonne Tromp, Yolanda Croes, Addonsito Croes y Mirtho Tromp a ricibi un reconocimento den forma di un award acompaña pa un speech personal di e productor.
Tambe Semi Chahmi e cameraman y editor a ricibi su merecido reconocimento pa e trabou genial efectua. E anochi aki tabata t’ey tambe e artista encarga cu e make-up Rena Croes y algun persona cu tabatin rolnan extra manera Marisol Tromp, Maria Chahmi y Mieckey Gravenhorst.
Despues di e exito di EBB1 y recien EBB2, a tuma e desicion cu lo bay pa e di tres parti di e pelicula aki. Den luna nacional, esta maart 2026, lo pasa atrobe EBB1 y EBB2. E filmacion di E BRUHA, BRUHÁ 3 lo start den april di 2026.
Na nomber di e produccion completo di Berea Production, inclui tur actor y productor, Desiree Croes, orguyoso director ganado, ta gradici pueblo di Aruba y di Corsou, sin lubida gruponan na Hulanda. Nan tambe a gradici prensa di Aruba. Mas cu 2000 Arubano a bishita EBB.
EBB ta un storia largo saca for di e buki di Desiree Croes titula “No Mas” y ta trata di e lucha di tres dama, mama, yiu y wela, contra e malbado director di Parke Nacional cu kier kita nan cas di cunucu for di nan y asina combertie den Airbnb.
{gallery}Desiree Croes a entrega reconocemento na crew di pelicula E Bruha, Bruha{/gallery}
