Awe 21 di Maart: Dia Mundial di Down Syndrome:
ORANJESTAD (AAN) Down Syndrome semper a forma parti di e condicion humano, y e ta existi den tur region di mundo y, habitualmente, e tin efecto variable den e estilonan di aprendizahe, e caracteristicanan fisico, y e salud.
E acceso adecua na e atencion di salud, na e programanan di intervencion trempan y na e enseñanza inclusivo, mescos na e investigacion adecua, ta vital pa e crecemento y desaroyo di e persona.
Na December 2011, e Asamblea General a designa dia 21 di Maart como Dia Mundial di Down Syndrome. Cu e celebracion aki, Organizacion di Nacionnan Uni (ONU) kier a genera un mayor consenshi publico tocante e asunto y recorda e dignidad inherente na dje, e valor y contribucion valioso di e personanan cu incapacidad intelectual, como promotor di bienestar y di e diversidad di nan comunidadnan.
Asina tambe, ONU kier resalta e importancia di su autonomia e independencia individual, particularmente e libertad di tuma su propio decisionnan.
Antecedentenan: E Down Syndrome y un alteracion genetico causa door di e existencia di material genetico extra den e chromosome 21 cu ta traduci su mes den incapacidad intelectual.
E calculacion di incidencia di Down Syndrome na nivel mundial ta situa su mes entre 1 di cada mil y 1 den cada 1.100 recien naci.
Salud y expectativa di bida: E personanan cu Down Syndrome sa presenta mas problema di salud en general. Sinembargo, e avancenan social y medico a logra mehora e calidad di bida di e personanan cu tin e syndrome. Na inicio di Siglo XX a wordo spera cu esnan afecta por a biba menos di 10 aña.
Awo, cerca di 80% di e adultonan cu ta padece di e Syndrome ta supera e edad di 50 aña. Un trabao medico y parental den edadnan trempan ta faborece nan calidad di bida y di salud di esnan cu ta sufri di e trastorno genetico aki door di satisface nan necesidadnan sanitario, cual ta inclui controlnan regular pa vigila nan desaroyo fisico y mental, ademas di un intervencion oportuno, ya sea cu fisioterapia, educacion special inclusivo of otro sistemanan di apoyo basa riba comunidadnan.
Mehora e sistemanan di asistencia: Tin biaha cu tur hende na mundo mester di ayudo. E personanan cu Down Syndrome mester di sosten pa hiba un bida normal y di integracion den e comunidad, manera tur otro hende.
Nan famianan tambe mester di un sistema di apoyo, ya cu frecuentemente nan ta esnan cu ta mantene e personanan cu D.S.
Hopi persona cu tin D.S na henter mundo no ta haya e sosten cu nan mester. Varios pais no tin e sistemanan di asistencia cu por responde na e necesidadnan di e personanan cu discapacidad y nan famianan. Of, e sistemanan di ayudo existente, no ta respeta e derechonan humano di e personanan aki.
Gobiernonan mester sigura cu tin sistemanan di apoyo pa e personanan cu discapacidad en general y Down Syndrome en particular, cu ta plenamente integra, den e comunidad. Potret cortesia: Sabrina Monge Campos.
