Den caso di boto cu a bolter entre Venezuela y Curaçao
WILLEMSTAD: E caso serio cu a socede riba lama entre Venezuela y Curaçao, unda Wardacosta a logra rescata varios persona cu a naufraga ora cu boto di nan a sink, den background a sigui cu investigacion, y e biaha aki a enfoca riba e aspecto di traficacion humano.
Relaciona cu loke a socede dia 4 di Maart 2025, oficialnan hudicial di Division di Crimen Organiza di Cuerpo Policial di Curaçao a haci dos detencion.
E detencionnan aki ta den cuadro di un investigacion penal di traficacion y exportacion di hende cu morto como consecuencia.
Nan a detene e homber Q.E.H.H. di 38 aña, y e homber M.O.J.N. di 40 aña, ambos naci na Venezuela. Nan detencion a socede na momento cu nan por a sali for di CMC Hospital na e isla.
Ya a presenta e sospechosonan dilanti di un Fiscal Auxiliar kende a ordena encarcelamento pendiente di mas investigacion. Segun Polis di Curaçao, no ta exclui cu lo bay tin mas detencion relaciona cu e caso aki.
