Cu apertura di Cas Veneranda ta celebra un etapa pa revitalisacion di centro di Playa  

Ministro Geoffrey Wever:

ORANJESTAD (AAN): Diamars, 28 di April, 2026 Minister di Finansa, Asunto Economico y Sector Primario, Geoffrey Wever, hunto cu Minister-President, colega Ministernan, Parlamentarionan, Famia Arends, señora Anne Witsenburg y henter e team di Monumenten Fonds Aruba, Departamento di Asuntonan Economico, Commercio y Industria y demas invitadonan, a celebra e apertura di Cas Veneranda.

   E apertura di Cas Veneranda ta señala un milestone grandi pa cu e revitalisacion di centro di Oranjestad. Un di e metanan di Gabinete AVP-Futuro ta pa trece bida bek den Oranjestad y San Nicolas. Cu e reubicacion di departamentonan di Gobierno den edificionan historico y monumental den centro di Oranjestad, e patrimonio nacional ta sigui wordo aprecia y preserva den un manera moderno.

   Minister Wever a destaca cu tres aña pasa, den su prome periodo como Minister di Asuntonan Economico, el a traha hunto cu Stichting Monumentenfonds Aruba pa logra e proyecto aki, y a asigna fondo for di su mesun presupuesto pa inverti den e iniciativa. Parti di e edificio lo wordo ocupa door di Departamento di Asunto Economico, Comercio y Industria, mientras cu otro parti lo bira un restaurant unda hospitalidad Arubiano lo sigui briya.

   E reubicacion aki lo yuda cu e meta pa atrae mas bishitante y trafico den centro di Oranjestad, creando beneficionan positivo pa e establicimentonan comercial den e bisindario. Minister Wever tambe a señala cu Gobierno a introduci varios incentivonan fiscal cu a drenta na vigor desde Januari 2026, manera e begunstigende beleid pa inversion y revitalisacion di Oranjestad y San Nicolas, e StartersRegeling pa stimula entrepreneurship, e Expat regeling pa atrae profesionalnan Arubiano den exterior pa bolbe bek Aruba, y e incentivonan di FreeZone pa haci Aruba mas atractivo pa diferente negoshi.

   Hunto, e incentivonan fiscal aki ta forma un pakete atractivo cu beneficionan pa facilita empresarionan y contribui positivamente na economia di Aruba. Minister Wever a enfatisa cu Cas Veneranda ta mas cu solamente un ehempel di revitalisacion y inversion den Oranjestad. “E ta simbolico. E edificio tabata un cas di un famia Arubiano unda generacionnan a lanta y crea memorianan. Nos a dicidi pa duna bida bek - no solamente restaura, pero converti den un luga unda historia y futuro ta topa.”

   E trayecto pa restauracion di Cas Veneranda, segun e Minister, tabata uno largo cu inicio den un vision cla pa revitalisa Oranjestad. For di dialogo cu Famia Arends, colaboracion cu Stichting Monumentenfonds Aruba, te na structuracion di financiamiento cu partnernan manera Nationaal Restauratiefonds y APFA, cada paso a wordo tuma cu cuido y responsabilidad. Despues di e acuerdo, a sigui un fase tecnico cu investigacion, diseño y preparacion pa e restauracion.

   Minister Wever a enfatisa cu Gobierno so no por revitalisa Oranjestad. Pa logra e meta aki pa Aruba, ta rekeri colaboracion estrecho cu sector priva cu kere den e vision aki y cu pasonan concreto, manera di awe, ta haci e vision realidad.

   Gobierno di Aruba a expresa palabra di agradecimento na tur organizacionnan cu a contribui pa haci e proyecto aki realidad,  señora Anne Witsenburg y henter e team di Monumenten Fonds Aruba, Nationaal Restauratiefonds, APFA y naturalmente, Famia Arends.

   “Gabinete AVP-Futuro ta tene su mes na su compromisonan cu pueblo, y cu e apertura di Cas Veneranda, nos ta orguyoso di por demonstra cu trahando hunto, nos por logra progreso real pa Aruba. Y esaki ta exactamente e tipo di progreso concreto cu pueblo di Aruba merece,” Minister Wever a conclui.