Directora di ATA Ronella Croes:
- ‘Turismo ta un negoshi di 24/7, hopi esencial’
ORANJESTAD (AAN)-- Den un entrevista cu DIARIO, señora Ronella Croes, CEO di Aruba Tourism Authority, a menciona cu ATA no ta envolvi den e tereno di transporte pa turistanan, pero nan sa cu e permiso pa e transporte aki a wordo amplia.
“Eynan tambe nos ta constata cu turismo ta un negoshi di 24/7, pues e ta hopi esencial. Nos a yega di trece dilanti caba, pa tur esnan cu ta brinda e servicio pa uni, y papiando di logistica, pa nan tin un sistema, kizas un tiki mas organiza, den ken ta trata cual servicio y con por maneha esaki di e miho manera posibel”, Croes a señala.
El a agrega cu como ATA, nan ta dispuesto pa colabora, pa un bez esaki ta regla, nan coopera cu e sector aki, manera riba actividad, entrenamento, unifica uniform pa nan, profesionaliza e sector aki ainda mas, si su deseo ta esaki.
El a señala tambe cu parti di e logistica ta encera e aspecto di tecnologia.
“Por ehemplo como ATA, ora mi a menciona e parti di logistica mi por bisa cu ya caba nos ta hopi contento cu loke nos ta hayando como data, pa medio di diferente instrumento cu nos ta coloca rond di nos isla of sitionan mas ocupa. Nos tas na diferente sitio riba un dia, na cada momento cuanto hende ta moviendo den e lugar aki. Anto kico esey ta hacio e ora ey? Cu hasta nos por informa e bishitante directamente y e operadornan, nan por wak live unda tin tanto hende na tal momento, y nos por duna bo conseho tambe como bishitante. Haci uso di tecnologia core bay asina leu pa nos y esey ta loke tambe nos tin den mente, como ATA, pa yuda mas den e area ey”, Ronella Croes, CEO di ATA a duna di conoce.
