Cu apenas 12 aña di edad Ivy Browne ta un artista hopi talentoso den pintamento

El a traha un bunita calendario:

Seccion Hubentud den Movecion a entrevista e talentoso hobencita Ivy-Anne Browne, ken cu apenas 12 aña di edad ya caba ta un artista den pintamento.

Ivy-Anne ta alumno di Examen klas na St. Paulus School, y e ta preparando hopi bon pa caba scol, y su expectativa ta pa bay Colegio pasobra e kier bira, den futuro, un docter di mucha.

Ivy a cuminza cu 8 aña bay les di pintamento cerca King-Sang Lie-Kwie, kiermen awo tin 4 aña ta tuma les cerca e talento local aki.

Un motor grandi tras di e hobencita aki ta su mama, Alissandra Bryson, ken ta motive tur dia pa e pinta un tema diferente pa reta su mes na esun cu a pinta e dia anterior, y por mira cu e tin un variacion di tema den su coleccion.

Por tuma entre dos cu ocho dia pa e completa un pintura, y esaki ta depende di e tema, con simple of con dificil e ta. E ta pinta riba canvas y e ta gusta pinta acuarela.

Ivy a pinta hopi cuadro caba, pero el a haci un seleccion pa traha un calender 2022. E cuadro cu el a pinta e luna di Juni, cu ta un gai (en conexion cu Dia di Dera Gai), el a obsekia na Minister di Cultura señora Xiomara Maduro, y esun di December el a obsekia na Chamaco Van der Linde, cu ta un amante di musica aguinaldo.

Ivy a haya algun sponsor pa traha cu calender, y el a duna diferente persona y instancia, pero no tabata pa bende.

Tambe el a haci un bunita calender magnetic cu un pintura traha cu puro pen, masha colorido, cu e mapa di Aruba cu e colornan di e bandera di nos Isla.

Bunita ta cu den futuro cu e ta sigui cu su curso di pintamento e lo haya un certificado door di e docente. E tin un proyecto na caminda, cu despues e ta duna nos Seccion informacion tocante kico e ta.

Manera Ivy a bisa na cuminzamento, e kier bira docter di mucha. “ Ora mi tabata chikito tabata tin un cartoon yama Doc. Mc. Stuffin (doctora juguetes), cu mi tabata wak tur dia. E ta un docter color bruin cu tabata parce mi, y mi no tabata cansa di wak tur dia su episodionan, mas cu tabata ripiti. Mi tabata tin delaster un cos di doctora Juguetes. E storia aki a inspira mi pa mi kier bira docter di mucha”, Ivy a conta nos.