CEDE Aruba por medio di Erasmus + a organiza e prome encuentro di Youth exchange Program

Un experiencia unico pa e hobennan participante:

CEDE Aruba, por medio di Erasmus + a organiza e prome encuentro di “Youth Exchange Program” (Programa di intercambio hubenil), cu e tema “Derechonan Humano”.

Den entrevista cu DIARIO, pa su Seccion Hubentud den Movecion, señora Yolanda Richardson-Smith di Centro pa Desaroyo di Aruba (CEDE Aruba), ken ta e coordinador general di e proyecto aki, cu ta tumando lugar den Centro Washington, a menciona cu e hobennan mes ta organiza e programa aki.

Tin siete hoben Arubiano y cuater partnernan internacional, di kendenan CEDE Aruba ta anfitrion.  E partnernan Internacional participante ta: Croatia di Ocean Znanja, International Service (UK), Caribbean Education and Culture Foundation di Sint Maarten y Brisa Intercultural di Spaña. Sra. Richardson a aplica cu e fondonan pa e proyecto aki, di cinco pais hunto, ta bin di Union Europeo.

Asha Thijsen, un hoben di 22 aña cu tin dos aña ta trahando como boluntario na CEDE Aruba, a indica cu pa un siman caba nan tabata organizando e proyecto di “Youth exchange” conhuntamente cu diferente organizacion di paisnan manera Croatia, Sint Maarten, Spaña y tambe Aruba.

Nan ta intercambiando culturanan pa medio di diferente actividad, cu ta trata e tema di Derechonan Humano. Dentro di e tema aki nan a trata e tema di educacion, derechonan di famia, derecho di casa, entre otro. E hobennan a intercambia cultura, pero tambe nan a siña hopi di otro, y asina nan a desaroya conocemento di otro, pero tambe crece den conocemento tocante kico ta derecho humano, y kico ta nan derechonan como hoben.

Thijsen a menciona cu en principio, a resalta e hecho cu no pasobra nan ta diferente pais, nan no tin nada en comun, pero enberdad tin hopi en comun. Por ehemplo, hopi pasion pa loke ta e derechonan humano, pero tambe e tipo di cosnan cu ta pasa den nos comunidad, den nos pais ta hopi similar cu nan. Nan a comparti esaki, tene compasion cu otro, y yuda otro pa asina por bay mas dilanti cu e tipo di cambionan cu nan kier implementa den nan respectivo comunidad y paisnan.

Asha a expresa cu e tabata un bunita dinamica, unda un por a siña di otro, aplica e tipo di estilonan cu nan ta trata otro, y cu tin diferente manera di comunica y asina crea un miho relacion entre otro.

Durante dos siman 30 hoben ta comparti e mesun cas y siña traha diferente proyecto, tayer di trabao, debate, actividadnan den aire liber, durante un periodo hopi cortico.

E meta specifico ta pa comparti un experiencia unico,  conociendo otro cultura, custumbernan y diferente forma di biba cu por yuda nan fortalece nan balornan, solidaridad, democracia y amistad.

E gruponan participante lo aumenta conciencia, conocemento den derecho humano, conocemento di nan respectivo pais, promoviendo balornan di libertad, tolerancia, democracia, respet pa derecho humano, pero mas cu tur creando union y amistad pafo di nan fronteranan.