Profesionalnan di viahe nada contento cu decision di CDC
ORANJESTAD (AAN): Apenas un dia despues cu e crusero Norwegian Pearl a bandona Miami pa un viahe di 11-dia door di Canal di Panama, e pasaheronan a wordo informa riba Diamars cu e barco lo regresa Miami, pasobra varios miembro di tripulacion a contagia cu Covid-19.
E compania NCL a bisa cu aunke tur pasahero y tripulante abordo di Norwegian Pearl tabata vacuna, varios miembro di tripulacion a test positivo pa Coronavirus.
E infeccionnan aki ta socede net awor cu e variante Omicron ta plamando masha hopi mes na Merca, y ta sigui plama tambe rond mundo.
Pa colmo siman pasa Diahuebs, e Center for Disease Control (CDC) na Merca a emiti un conseho pa pasaheronan pa awor evita di subi barconan crusero, sin importa si bo ta vacuna of no, debi na e explosion di contagio di e virus riba cruseronan, desde cu e variante nobo hopi contagioso a cuminza plama na November.
Norwegian Pearl cu por carga casi 2.400 pasahero y 1.100 miembro di tripulacion, tabata prepara pa bishita Cartagena (Colombia), Pasa door di Canal di Panama, Colon, Puerto Limon (Costa Rica), Roatan, Belize, y Costa Maya (Mexico).
Pasaheronan a wordo avisa cu 50 miembro di tripulacion a test positivo, pues e barco tin di bay bek. Pa e compania e tabata un decision dificil.
Profesionalnan di Viahe ta reacciona: Mientras tanto e conseho di CDC na Merca pa desconseha hendenan di haci viahe riba cruiseship, no a cay den bon tera cerca e Profesionalnan di Viahe.
Zane Kerby, kende ta President y CEO di American Society of Travel Advisors (ASTA) a emiti un declaracion pa reacciona riba loke CDC a declara pa desconseha viahe.
“E aumento den casonan di Covid riba cruseronan no mester sorprende ningun hende, mirando e explosion global causa pa e variante Omicron cu ta hopi contagioso. E diferencia di goza un vacacion di crusero y bishita bo supermarket of restaurant local, ta e medidanan hopi estricto anti-Covid cu a wordo crea voluntariamente door di lineanan crusero, den consulta estrecho cu CDC. E medidanan aki ta inclui pruebanan di vacunamento, limpieza, bistimento di tapaboca, y otro medidanan respalda pa ciencia, como tambe protocolnan pa responde riba posible casonan di Covid-19.”
“Si e promedio di cruseronan tabata un Estado Mericano, e lo tabata esun mas safe awor na Merca!”
Segun cifranan cu Royal Caribbean a suministra, ta mustra cu desde viahenan crusero a cuminza bek na Merca na luna di Juni 2021, nan barconan a transporta 1.1 miyon pasahero, di cual 1.745 persona a test positivo. Esey ta un ‘positivity rate’ di apenas 0.02 porciento. Esey ta hopi mas abao compara cu Estadonan Mericano. Alaska por ehemplo mes, tin e rate mas abao di 9,4 porciento, y Georgia ta esun di mas halto cu 38,7 porciento.
“Cruseronan no ta mas responsable pa e contagio di variante Omicron, compara cu viaheronan cu a bin for di Zuid Africa na comienzo di e crisis actual. Pero e profesionalnan di travel ta sigui mira reaccion- y tratonan discriminatorio pa cu viahamento. Siendo cu e sector di viahe tin mas reglamento vigente compara cu otro actividadnan, y toch ora cu casonan di Covid subi, of tin variante nobo, semper e sector di viahe ta haya un golpi duro.
E ta parce e dicho bieu, “si tur loke bo tin ta un martieu, e ora tur cos ta cuminza parce un clabo.” Nan ta haya cu e patronchi aki mester yega na su fin.
E grupo di ASTA a bisa cu nan a nota con Gobierno Mericano a bin ta mustra flexibilidad riba su medidanan Anti-Covid, incluyendo e recien decision dia 26 di November pa elimina prohibicion di viahe pa ocho pais den parti zuid di Africa. Nan ta pensa cu algo asina por socede tambe den e sector di crusero. Na e etapa aki di e pandemia, hermentnan ta existi pa combati e virus sin cu bo ta paraliza henter e sector di economia den e proceso.
