ORANJESTAD (AAN): Minister Dangui Oduber a declara den conferencia di prensa diaranson mainta ora cu DIARIO a puntre riba e desaroyo pa loke tabata e expresionnan haci door di Director di Hospital,
cu ainda e no a hiba ningun combersacion cu e representante di e institucion medico.
Minister Oduber a bisa cu segun e tin entendi Sr. Jacco Vroegop no tabata na Aruba, pero cu diaranson e tabata na Bestuurskantoor reuniendo cu e ministerio y algun colega di OMT y e minister mes no por tabata presente den e reunion.
E mandatario a laga sa cu segun version di Vroegop, e lo a bisa cu e no a bisa esey."Ta keda na dje pa duna e informacion cu e tabata kiermen cu e statement asina ey".
Relaciona cu esaki Minister Oduber a bisa cu tur hende tin derecho di expresa su mes. Pero na momento cu e director ta papia den nomber di hospital cu sosten di e Outbreak Management Team y ta expresa den nan nomber cu e vacuna no ta duna resultado, e ora ey gobierno tambe lo a sigui e conseho ey di expertonan y a bay di acuerdo cu ne sin e urgencia di stimula e comunidad pa bay tuma e vacuna, a remarca.
E diferencia ta cu e team ta bisa pa bay tuma e vacuna y e 'booster', pero e director di HOH a titulo personal ta bisa den su opinion cu e vacuna no ta duna resultado. E mag di tin su opinion y nunca a obliga ningun hende pa tuma e vacuna y no ta bay hacie tampoco.
Simplemente e estadisticanan ta mustra cu e vacuna ta duna y a duna e resultado. Pesey gobierno ta sigui e conseho di expertonan pa recomenda tur hende cu no a vacuna pa bay tum'e y esnan cu no a tuma nan booster pa bay tum'e, Oduber a expresa.
El a agrega cu Sr. Vroegop tin un funcion unda e mester duna ehempel ya cu e ta director di e hospital di Aruba y e ta forma parti di OMT. "Na momento cu ta expresa bo mes di e forma ey, naturalmente bo mester por onderbouw bo ponencia tambe".
E argumentonan di e director di HOH ta contradeci e propio estadisticanan, e minister a señala. Awo e director ta bisa cu tabata kiermen algo otro. Pesey awor ta keda na dje pa clarifica ki otro e tabata kiermen cu e expresion ey, Oduber a declara.
Ta bon pa puntr'e ki otro e tabata kiermen y e lo mester duna mas informacion y clarifica kico tabata su intencion cu un statement asina, a bisa.
