Cu simplesa di profesionalismo a dirigi e trafico financiero den pandemia --- *Su maneho mester a evita bancarota di Aruba durante pandemia --- *Bon gobernacion ta depende di placa cu ta gasta y placa cu ta drenta
ORANJESTAD (AAN) — Gobernacion di un pais ta depende di placa y e forma cu ta maneha placa.
Sin placa, e medio di pago na Aruba, ningun hende ta sobrebibi. Un productor of importador di cuminda lo por sobrevivi pero e mester di hende pa traha su cas y paña pa e bisti.
Esaki pues ta causa trafico di placa na un pais, cu mester cubri su gastonan pero tambe conoce un situacion cu ta permiti poblacion traha placa.
E realidad di placa tabata base di e problema mas serio di Aruba for di entrada di Siglo 21, cu a cuminsa cu e recesion grandi, e problema serio di placa na mundo.
Aruba mester a tuma medida y esaki a produci BBO cu tabata parti di reforma di belasting cu a wordo modernisa cu belasting indirecto pa cual mas y mas paisnan a cuminsa dicidi.
Aruba conoce e historia di BBO, cu a bira un asunto politico cu a habri porta pa e crisis financiero grandi y hunto cu e debe nacional, a deshaci di autonomia financiero di Aruba.
Na 2017 Reino Hulandes a considera e presupuesto cu Gobierno Mike Eman a laga atras como algo chistoso.
Na 2017 hopi asunto sumamente serio pa e fundeshi di placa di Aruba a tuma lugar y tabata menasa e base solido di e Florin Arubano.
Tabata tin pues e crisis financiero cu Gobierno Mike Eman a laga atras base di e debe nacional y pago cu mester a tuma lugar ainda di e proyectonan PPS.
Pero na 2017 tabata tin tambe e pregunta grandi si Citgo realmente lo a bira realidad di Aruba, caminda ni Banco Central tabata tin un planificacion concreto di loke Aruba por a spera na entrada di Citgo directamente of indirectamente.
Den un situacion sumamente dificil, Ministro Xiomara Maduro a haci su entrada.
Como profesional el a tuma rienda di placa di Aruba cu tabata tin un Florin agonisante.
Hulanda a pone exigencia riba mesa di un Aruba den estado di bancarota y emergencia financiero di Aruba, cu mester a scrap e ilusion di Citgo pero tambe mester a cuminsa paga tur e debenan di proyectonan cu a wordo traha sin placa pa paga.
E sistema di traha proyecto y paga despues, a laga proyecto atras pero tambe necesidad pa paga.
Cu firmesa Ministro Xiomara Maduro a traha pa na 2020 entrega Aruba cifranan den cual gastonan tabata wordo cubri dor di entrada di e pais.
Covid-19 a deshaci di e plannan aki. Aruba a cera su portanan.
E caha di placa di Aruba a perde e gran mayoria di su entrada.
Un exigencia historico a wordo entrega na Xiomara Maduro como Ministro di Asuntonan Financiero.
Pa placa por a drenta caha di Gobierno, e Florin mester a sigui lora, manera el a indica. Esaki tabata nifica cu e mester a bini cu adaptacion di belasting entre otro pa e companianan mas chikito por a sobrevivi.
Companianan cu den hopi caso, ta pertenece na hende cu un persona cu ta traha riba su mes.
2021 a bati na porta cu exigencianan serio pa habri caminda pa recuperacion.
Bon gobernacion di Gobierno ta cuminsa y caba cu placa pa e pais por funciona. Placa cu ta drenta mester cubri gasto di placa cu mester saca.
Cu trankilidad pero hasta cu sonrisa riba su cara, Ministro Xiomara Maduro a cumpli cu su encargo.
Cu palabranan simpel el a haci Pueblo comprende e trabou cu e mester a haci pa Aruba recupera den tempo di crisis di Covid-19 di e crisis prome cu e malesa a bati na porta.
Ministro Xiomara Maduro a logra den su esfuerso pa placa sigui circula na 2021, cu a presenta exigencianan sumamente serio pa maneho financiero, di cual futuro di e pais ta depende.
2022 ta spera cu un macuto di exigencianan serio y cu incertidumbre grandi pa loke ta trata inflacion, entrada di gobierno cu un economia mundial dudoso mester produci pa Aruba tambe.
Covid-19 ta bolbe ataca cu un variante nobo.
Ministro Xiomara Maduro no por perde nada for di bista mientras e ta vigila placa cu ta drenta y placa cu ta sali di e caha di Pueblo cu el a ricibi sin placa pero yena cu debe cu mester baha.
Mientrastanto Florin ta sigui lora na caminda pa 2022 cu lo trece mas reto enorme pa e Ministro cu mester a evita bancarota di Aruba den pleno pandemia!
Elogio pa e trabou cu el a realisa, ta na su lugar.
