E diferencia entre responsabilidad di Gobierno y Sindicato confirma
*Algo mas cu un reto personal ta spera e proximo dirigente sindical
*Na Bonaire e lo por atende directamente cu Gobierno Hulandes
ORANJESTAD(AAN)_-Sin duda pa oposicion ayera (si ta ayera nan a wordo informa) lo tabata un dia dificil.
E anuncio cu e Presidente di Simar, cu proximamente e lo bandona Aruba pa sigui habri su caminda di bida na Bonaire, tabata un sorpresa grandi.
Pero no mester desespera! El a bisa cu ainda e no a bay y cu e lo sigui activo manera semper na Aruba.
Na prome lugar naturalmente nos ta desea Josephine Albertus hopi exito na Bonaire, caminda directamente e lo por atende cu Gobierno Hulandes cu ta trata na tur forma pa atende cu e deber enorme cu e tin cu Pueblo di Bonaire cu a kere cu ser un parti directo di Hulanda, lo a percura pa mes derecho cu e poblacion di Hulanda.
Pa atende cu e despedida inespera di Josephine Albertus, na prome lugar nos mester trece dilanti cu awor tin un prueba cu e responsabilidad di un presidente di un sindicato ta diferente na e responsabilidad di un Gobierno, cu no por por bisa cu el a haya un reto nobo na Bonaire.
Ta sumamente dificil pa Gobierno Wever-Croes dicidi cu e no ta goberna Aruba mas pero cu e ta acepta un reto pa bay traha na Bonaire, cu ta un parti directo di Hulanda pasobra e islanan BES ta keda “Gemeente Extra Ordinario” y no parti “Ordinario” di Hulanda.
E hecho cu nan no a haya Euro pero a haya Dollar ta prueba cu no ta facil pa atende cu Hulanda.
Nos pregunta serio ta, kico Josephine lo haci ainda pa Aruba, cu como Presidente di Simar na hopi ocasion el a pone bou basta tension.
Pa nos por ta prepara pa tur cos, nos kier puntra cuanto tempo mas Josephine Albertus tin pensa di traha pa Aruba y si e trabou aki lo causa entre otro welga, paro pa un rato of pa henter dia, problema laboral etc. pa Aruba, cu mester di tur reto na e momento aki pa e por sigui cana den un mundo dificil.
Henter Aruba no por bay Bonaire pa un reto nobo pero ta sumamente contento si, cu Josephine por haci esaki.
Con contento Mike Eman como lider di Oposicion di Aruba ta cu Josephine ta bandona mundo sindical, tampoco nos por bisa.
Pero talbez Josephine Akbertus por ta ainda na Aruba, ora Mike Eman pone un paro general pa asina trata na baha Gobierno pa Mike Eman sinta.
Nos ta en espera di e proximo lider di Simar, e sindicato cu nunca a comprende DIARIO y cu DIARIO tin hopi problema pa comprende.
Pero exito nos ta desea Josephine den futuro na Bonaire!
